बारा । बाराको जीतपुरसिमरा उपमहानगरपालिका–१६ मा विपन्न तथा दलित समुदायका लागि ‘विपन्नसँग मदन भण्डारी आवास कार्यक्रम’ अन्तर्गत निर्माण भइरहेका घरहरूको जग्गा कुन वडामा पर्छ भन्ने विषयमा विवाद चर्किएको छ । वडा नम्बर १५ र १६ मा चलिलरहेको विवादको कारणले निर्माण कार्य नै रोक्नुपर्ने अवस्था आउने संकेत देखिएको छ । 

विपन्नसँग मदन भण्डारी आवास कार्यक्रम’ अन्तर्गत बारामा निर्माण भइरहेका घरहरूको जग्गा कुन वडामा पर्छ भन्ने विषयमा विवाद चर्किएको छ । वडा नम्बर १६ ले निर्माण भइरहेको स्थान आफ्नो क्षेत्राधिकारभित्र पर्ने बताउँदै आएको छ भने वडा नम्बर १५ ले सो स्थान आफ्नो वडाभित्र पर्ने दाबी गर्दै निर्माण कार्य रोक्न जिल्ला प्रशासन कार्यालय बारा र पूर्वाधार विकास कार्यालय बारा दुबैलाई लिखित रूपमा पत्राचार गरिसकेको छ । 

वडा नम्बर १५ को दाबी अनुसार, निर्माण भइरहेको स्थान पहिलाको खोला रहेको र खोला भएको स्थानमा केही व्यक्तीको नम्बरी निजी जग्गा भएकाले त्यहाँ पक्की संरचना बनाउँदा प्रभावित हुने जिकिर गरिरहेको छ । तर वडा नम्बर १६ का पदाधिकारी र स्थानीय बासिन्दाले भने २०७७ सालमै सिमाना नापजाँच भइसकेको र सो क्षेत्र वडा १६ कै भएको तर्क गर्छन् । 

यता, १६ का वडा अध्यक्ष हरिदेव खरेलले दलित समुदायका लागि बनाइँदै गरेका पक्की घरहरूमा नियोजित रूपमा अवरोध सिर्जना भइरहेको आरोप लगाइरहेका छन् । 

उसोतः वडा नम्बर १६ का पूर्ववडाध्यक्ष पनि सीमा क्षेत्रबारेको विवादमा पहिले नै टुंगो लागिसकेको भन्दै अनावश्यक बखेडा झिक्न खोजिएको दाबी गरिरहेका छन् ।

यसैबीच, जिल्ला प्रशासन कार्यालय बाराले निर्माणस्थलमा अनुगमन गरेको छ । अनुगमनमा पुगेका सहायक प्रमुख जिल्ला अधिकारी छविरमण भट्टराईका अनुसार अहिले वर्षा र हिलोका कारण स्थलको सटीक नापजाँच गर्न सम्भव नभएको र प्रशासनले तत्कालका लागि त्यसलाई निर्माण रोक्ने निर्णय नभएको बताइएको छ । 

यसैगरी, डिभिजन वन कार्यालय बाराका प्रमुख राजिव झाले पनि सो क्षेत्रको जग्गा वन क्षेत्रमा पर्छ कि निजी स्वामित्वको हो भन्ने अहिले नै भन्न नसकिने बताएका छन् । केही स्थान नदीको धार परिवर्तनसँगै सरेको देखिन्छ त्यसैले नापजाँच नगरी स्पष्ट रूपमा भन्न सकिने अवस्था छैन । 

पूर्वाधार विकास कार्यालय बाराकी प्रमुख रिम्पु कुमारी यादवका अनुसार, निर्माण कार्य सबै प्राविधिक मापदण्ड र इस्टिमेट अनुसार भइरहेको छ । उनले सो क्षेत्र दलित र विपन्न समुदायको बसोबास भएको उल्लेख गर्दै केही व्यक्तिहरूले नियोजित रूपमा विकास कार्यमा अवरोध सिर्जना गरिरहेको बताइन । वडाबाट सिफारिस भएर आएका स्थानहरूमा मात्र घर निर्माण गर्ने बताउदै बाराका ३२५ स्थानमा यस्ता घर निर्माण भइरहेको यादवले बताएकी छन् ।  

विवाद अझ चर्किएपछि वडा नम्बर १५ का अध्यक्ष रामप्रसाद लामिछाने अनुगमन गर्न स्थलमा पुगेका थिए । तर उनी त्यहाँ पुग्दा स्थानीयले उनको दाबीको विरोध गरे । अध्यक्ष लामिछानेले झुटो दाबी गर्दै विकास कार्यमा अवरोध गरिरहेका भन्दै स्थानीय आक्रोशित भएका छन् । अहिले जीतपुर  सिमरा–१६ मा विपन्न र दलित समुदायका लागि २० वटा पक्की घर निर्माण भइरहेको छ ।