मकवानपुर । बागमती प्रदेश सरकारको लगानीमा निर्माण भएको धुलो दूधको पाउडर कारखाना निर्माण सम्पन्न भएको दुई वर्ष बित्यो । हचुवाको भरमा राज्यकोषको ४७ करोड बढीको लगानीमा निर्माण गरिएको धुलो दूध कारखाना निर्माण सम्पन्न भएपश्चात डीडीसीलाई परिक्षण उत्पादनका लागि भन्दै दिइएको  छ । डीडीसीले हाल आवश्यकताका आधारमा उद्योग सञ्चालन गरे पनि यसलाई दीर्घकालीन रुपमा कसरी सञ्चालनमा ल्याउने भन्नेमा प्रदेश सरकार आफै अन्योलमा छ । 

बागमती प्रदेशको राजधानी हेटौंडामा राज्यकोषको ४७ करोड बढीको लगानीमा निर्माण गरिएको धुलो दूध कारखाना निर्माण सम्पन्न दुई वर्ष वित्दा पनि सञ्चालन अवस्था अन्योलग्रस्त छ । बागमतीका तत्कालिन मुख्यमन्त्री डोरमणी पौडेलले २०७७ पुस १६ गते धुलो दूध कारखानाको शिलान्यास गरे । 

तत्कालिन अवस्थामा ४१ करोड २२ लाख ७१ हजार रुपैयाँमा ठेक्का सम्झौता गरेकोमा नयाँ संरचना निर्माण लगाएतको लागि भन्दै राज्यकोषको ४७ करोड रुपैयाँ खर्च पनि गरियो । तर, करिब ३ वर्षमा निर्माण सम्पन्न भएको धुलो दूध कारखाना कुन मोडालिटीमा सञ्चालन गर्ने ? भन्ने टुंगोमा प्रदेश सरकार पुग्न सकेको छैन । २०८० माघबाट परिक्षण उत्पादनका लागि डिडिसीलाई दिइएकोमा हालसम्म पनि डिडिसीले नै धुलो दूध उत्पादन गर्दै आएको छ । 

मिल्क होलीडेको अवस्थामा किसानले उत्पादन गरेको दूध खेर जान नदिनका लागि पाउडर प्लान्ट निर्माण गरिएको प्रदेश सरकार बताउँछ । धुलो दूध कारखाना जति कम चल्यो, उति किसानहरुको लागि फाइदाको विषय हुने दाबी गर्दै कारखाना चलेन भनेर चिन्ता गर्नु उचित नहुने प्रदेश दूग्ध विकास बोर्डका निर्देशक डा. राम प्रकाश प्रधान बताउँछन् । 

त्यसोत, प्रदेश सरकारको लगानीमा बनेको धुलो दूध कारखाना सञ्चालनका लागि कार्यविधि बनाउने तयारीमा प्रदेश दुग्ध विकास बोर्ड र प्रदेशको कृषि तथा पशुपन्छी विकास मन्त्रालय लागिपरेको बताइएको छ ।

कारखाना चलाउन चाहाने संस्थालाई लिजमा दिनका लागि गतवर्ष अध्ययन भएको बताउँदै अब सञ्चालनको कार्यविधि अन्तिम चरणमा पुगेको कृषि तथा पशुपन्छी विकास मन्त्रालयको दाबी छ । यसलाई अबको केही समयभित्रै चलाउनेगरी मन्त्रालयले गृहकार्य गरिरहेको कृषि मन्त्री मधुसुदन पोडेल बताउँछन् । 

विगत डेढ वर्षदेखि आधिकारिक सम्झौताबिनै आन्तरिक रुपमा डिडिसीले उक्त उद्योग संचालन गरिरहेको छ । डिडिसीलाई उद्योग संचालन गर्न दिने विषयमा मन्त्रालय र बोर्डले कुनै औपचारिक निर्णय नगरी सामान्य लिखित सहमतीमा काम भइरहेको हो ।

उद्योगमा अझै धेरै संरचनाहरुको अभाव रहेका कारण पाउडर उत्पादनमा सहजता नमिलेको डिसिडीको अनुभव छ । तथापी, हालसम्मको अवधिमा ११ लाख लिटर दूध प्रशोधन गरेर पाउडर उत्पादन गरेको डिडिसीको तथ्यांक छ । परिक्षणकालका लागि धुलो दूध उत्पादन गर्दा मेसिनरी सामानहरुमा समस्या नभएको र डिडिसीले नै प्लान्ट चलाउन पाए अझै राम्रोसँग उद्योग चलाउन सक्ने डिडिसीको दाबी छ ।