काठमाडौं । प्रधानमन्त्री केपी ओलीले संसदलाई सम्बोधन गरेका छन् । शनिबार चीन भ्रमण गर्न लागेको जानकारी संसदलाई दिएका प्रधानमन्त्री ओलीले हैजा नियन्त्रणदेखि चीन भ्रमणको विषयमा विस्तृत रुपमा जानकारी गराए । चीन भ्रमणको मूल उद्देश्य चीनको थियानजिन शहरमा आयोजना हुने शाङ्घाई सहयोग संगठन (शाङ्घाई कोअपरेशन अर्गनाइजेशन) को शिखर सम्मेलनमा भाग लिने विषयलाई प्रधानमन्त्री ओलीले केन्द्रमा राखेका छन् । 

प्रधानमन्त्री केपी ओली शनिवार चीन भ्रमणमा जाँदैछन् । चीन भ्रमणमा जान लागेका प्रधानमन्त्री केपी ओलीलाई संसदले समेत विभिन्न सुझाव दिएको छ, भने संसदमा सांसदहरुले अनेक समस्या समेत राखेका छन् । संसदमा राष्ट्रिय स्वतन्त्र पार्टी र राष्ट्रिय प्रजातन्त्र पार्टीको निरन्तरको विरोधकाबीच चलिरहेको प्रतिनिधिसभामा विश्वासको वातावरण सिर्जना हुनुपर्नेमा समेत जोड दिन थालिएको छ । यस्तोबेला रास्वपा र राप्रपाले अवरोध जारी राखे । त्यसपछि भएको प्रधाानमन्त्रीको सम्बोधनमा सभामुखले चित्त दुखाएको छनक दिएका छन् । संसदलाई साझा थलो र सहमतिको थलो बनाउनुपर्नेमा सभामुख घिमिरेको जोड छ ।

यसपटक संसदमा प्रधानमन्त्री ओलीले सम्बोधनको क्रममा खास तीतो पोखेनन् । चीन भ्रमणबारे संसदलाई जानकारी गराउदै आफ्ना कार्यक्रमबारे भने प्रष्टसाथ बताए । 

प्रधानमन्त्री ओलीले आफ्नो सम्वोधनको क्रममा मधेसका विभिन्न जिल्ला र क्षेत्रमा फैलिएको हैजा नियन्त्रणका लागि समेत सरकारले उचित पहल गरिरहेको दाबी गरेका छन् । हैजा नियन्त्रणमा प्रधानमन्त्री ओलीले प्रतिबद्धता व्यक्त गरेपनि यो भयावह बन्ने त होइन भन्ने चिन्ता भने बढिरहेको छ । यद्यपी ओलीले यसको नियन्त्रणका लागि काम गर्ने प्रतिबद्धता भने व्यक्त गरेका छन् । 

कूटनीतिक महत्वको चीन भ्रमण

प्रधानमन्त्री ओलीको चीन भ्रमण अत्यन्तै महत्वकपूर्ण हुनेछ । ओलीले चिनियाँ राष्ट्रपति सी जिन पिङसंग समेत भेट्ने कार्यक्रम रहेको जानकारी गराएका छन् भने ओली जापानविरुद्ध चीनले मनाउन गइरहेको भिक्ट्रि परेडमा समेत सहभागी हुने बताइएको छ । 

यस्तो विषयमा ओलीको अर्थपूर्ण सहभागीता हुन लागेको बेला के चीनले नेपाल भारत सीमा विवादमा गरिरहेको अनदेखालाई सम्बोधन गर्ने प्रतिबद्धता जनाउला ? यो विषय भने चासोमा छ । मित्रराष्ट्र चीनका राष्ट्रपति सी चिनफिङको मैत्रीपूर्ण निमन्त्रणामा नेपाली प्रतिनिधिमण्डलको नेतृत्व गर्दै प्रधानमन्त्री ओली यही भदौ १४ देखि १८ (तदनुसार अगष्ट ३० देखि सेप्टेम्बर ३) सम्म चीनको पाँचदिने भ्रमणमा चीन जाँदैछन् ।

भ्रमण दलमा प्रधानमन्त्री ओलीकी पत्नी राधिका शाक्य, पूर्वउपप्रधानमन्त्री एवं प्रतिनिधिसभा सदस्य पूर्णबहादुर खड्का, शिक्षा, विज्ञान तथा प्रविधिमन्त्री रघुजी पन्त, संस्कृति, पर्यटन तथा नागरिक उड्डयनमन्त्री बद्रीप्रसाद पाण्डे, पूर्वमन्त्री एवं प्रधानमन्त्रीको आर्थिक तथा विकास सल्लाहकार डा युवराज खतिवडा, पूर्वमन्त्री एवं प्रतिनिधिसभाका सदस्य छविलाल विश्वकर्मा र नेपाल सरकारका उच्चपदस्थ कर्मचारी सहभागी हुने जनाइएको छ ।