काठमाडौं । नेकपा माओवादी केन्द्रका अध्यक्ष प्रचण्डले भनिरहेका छन, पहिलेको जस्तो सान अब रहेन । किन प्रचण्डको सान घट्न पुग्यो ? के प्रचण्डले नेतृत्व गरेको १० वर्षे युद्ध, युद्धबाट प्राप्त उपलब्धि र माओवादी आन्दोलनले दिएको उपाधिको रक्षाका निम्ति उनले काम गरे त ? कहाँ–कहाँ चुक्दा प्रचण्डको सान घट्न पुग्यो वा पार्टीभित्रको आन्तरिक विवाद र टुटफुटबाट यस्तो स्थिति सिर्जना भयो त ? 

माओवादी केन्द्रका अध्यक्ष प्रचण्डको पहिले जस्तो सानमान रहेन रे , उनको सानै घट्यो रे ? तर किन ? कुनै समय क्रान्तिका नायकका रुपमा चर्चा गरिने प्रचण्डको सान अहिले नरहनुको खास कारण के होला त ? खासमा यतिबेला प्रचण्ड पार्टीभित्रको आन्तरिक विवादका कारण चर्चामा छन् । 

आफूमाथि भइरहेका निर्मम आलोचना र टिप्पणी सहन गर्न कठिन बनेपछि प्रचण्डले व्यक्तिगत तहमै उत्रिएर प्रतिरोध गरिरहेका छन् । कुनैबेला पार्टी विभाजनपछि शक्ति क्षयीकरण भयो भन्ने प्रचण्डले अहिले फेरि पार्टीभित्रै उमहासचिव जनार्दन शर्माको घेराबन्दीका कारण तनाव झेलिरहेका छन् । प्रचण्ड अहिले आफ्नो शानमान घटेको महशुस गर्न थालेका छन् । 

प्रचण्डले आफ्नो शान घटेको भन्दै गर्दा पार्टीभित्रको आन्तरिक विवाद समाधानको सट्टा, हो हजुर भन्नेहरुको संरक्षण गर्दा यस्तो स्थिति सिर्जना भयो कि भन्ने आत्मसमिक्षा गरेको भने पटक्कै देखिदैन । तर, पनि  प्रचण्डले भनिरहेका छन्, जनतासंग आफ्ना गल्तिलाई प्रष्ट स्वीकार गर्ने कोहि छ भने त्यो माओवादी नै हो । जनतासंग गल्ती स्वीकार्ने र फेरि त्यो गल्ती नदोहो¥याउने प्रतिबद्धताको पछिल्लो समय केही अभावका कारण माओवादीको जनमत अहिले ओरालो यात्रामा छ । पार्टी विभाजनका श्रृङ्खला पनि रोकिने छाँट देखिन्न । 

मोहन वैद्यदेखि विप्लवसम्म र विश्वभक्त दुलाल आहुतिदेखि गोपाल किरातिसम्मका विभाजनले माओवादीको शक्ति घट्दो छ । अहिले फेरि माओवादीभित्रको विवादको नेतृत्व गरिरहेका छन, उपमहासचिव जनार्दन शर्माले । 

शान्ति प्रक्रियादेखि रुकुम पश्चिमबाट  निरन्तर निर्वाचन जित्दै आएका जनार्दनले कोशी प्रदेशमा गरिरहेको प्रभाव विस्तार र कर्णालीमा उनको शक्तिको मापन गर्दै चलिरहेको विवादले प्रचण्डलाई पनि खिन्नता भने बढ्दो देखिन्छ । त्यसैले उनले भनिरहेका छन, शान घट्यो । एक पटक नेता कार्यकर्ताहरु जेल–नेल भोग्न तयार हुनुपर्छ । के प्रचण्डले आह्वान गर्ने वित्तिकै अब माओवादीमा फेरि जेल जान तयार हुने कोहि देखिएलान् ? 

प्रचण्डको शान बढाउनकै लागि लड्नेहरु निस्किएलान् ? संकटको घेरामा रहेको माओवादीले खोजिरहेको प्रश्नको जवाफ भेट्टाउन भने मुस्किल छ ।