रौतहट । जिल्ला प्रशासन कार्यालय, रौतहटले गौर नगरपालिकाका विभिन्न क्षेत्रमा अनिश्चितकालीन कफ्र्यु लगाएको छ। आज दिउँसो १ः०० बजेदेखि सदरमुकाम गौरको पूर्वः मुडबलवा गेट,पश्चिमः लालबकैया नदीको तटबन्ध (बाँध),उत्तरः बम नहर, दक्षिणः गौर भन्सार कार्यालय क्षेत्रभित्र आवतजावत गर्न, भेला हुन, सभा–जुलूस गर्न र प्रदर्शन गर्न पूर्ण रूपमा निषेध गरिएको प्रमुख जिल्ला अधिकारी दिनेश सागर भुसालले जनकारी दिए ।
गौर नगरपालिका –६ सबगढामा दुई पक्षबीच भएको साम्प्रदायिक विवाद र झडपका कारण स्थिति नियन्त्रण बाहिर जान थाले पछि प्रशासनले यो कदम चालेको हो।
बिहीबार राति एउटा विवाहको जन्तीले बजाएको बाजाका विषयमा दुई समुदायबीच विवाद सुरु भएको थियो। शुक्रबार र शनिवार ढुङ्गामुढा र झडप भएपछि सुरक्षा संवेदनशीलतालाई ध्यानमा राख्दै स्थानीय प्रशासन ऐन, २०२८ को दफा ६ (क) बमोजिम कफ्र्यु जारी गरिएको हो।
हाल गौर र आसपासका क्षेत्रमा ठूलो संख्यामा नेपाल प्रहरी र सशस्त्र प्रहरी बल परिचालन गरिएको छ। प्रशासनले स्थानीयबासीलाई शान्ति कायम राख्न र कफ्र्युको उल्लंघन नगर्न आग्रह गरेको छ।
