काठमाडौं । नेपालको औद्योगिक घराना चौधरी ग्रुपले भारतको रिलायन्स इण्डस्ट्रिजसँगको सहकार्यमा क्याम्पा कोला नेपाली बजारमा ल्याएको छ । रिलायन्स इन्डस्ट्रिजले चौधरी गु्रपसँग सहकार्यमा नेपालमा क्याम्पा कोला उत्पादन र वितरण सुरु गरेको हो । 

रिलायन्स इण्डस्ट्रिजले नेपालमा दीर्घकालिन सोंच तथा लक्ष्यका साथ शुरु गरेको योजना अन्तर्गत नेपालमा पनि क्याम्पा कोला उत्पादन शुरु गरिउको छ । आरसीपीएलका कार्यकारी निर्देशक केतन मोदीले क्याम्पा कोला ५० वर्ष पुरानो ब्रान्ड भएकोले नेपालमा पनि सफल हुने विश्वास गरेका छन् । 

चौधरी ग्रुपका प्रबन्ध निर्देशक निर्वाण चौधरीले रिलायन्ससँगको साझेदारीले नेपाली उपभोक्तालाई गुणस्तरीय पेय पदार्थ उपलब्ध गराउने बताउँदै नेपालमा दिर्घकालिन योजनामा लगानीकर्ताको विश्वास बढ्ने बताए । 

चौधरी गु्रपका प्रवन्ध निर्देशक चौधरीले नेपालमा लगानी राम्रो वातावरण रहेको सन्देश दिन सकेमा अन्तराष्ट्रिय लगानीकर्ताहरु आर्कर्षित हुने बताए । 

क्याम्पा कोला रिलायन्स इन्डस्ट्रिजको एफएमसीजी विङ र रिलायन्स कन्जुमर प्रडक्ट्स लिमिटेडद्वारा उत्पादित अन्तर्राष्ट्रिय रूपमा ख्यातिप्राप्त भारतीय कोल्ड ड्रिंक ब्रान्ड हो । क्याम्पा कोलाको नेपाल आगमनले रिलायन्सको सीजीसँगको व्यावसायिक सम्बन्ध विस्तार तथा समग्र नेपाल प्रतिको दीर्घकालीन प्रतिबद्धता थप पुष्टि हुने चौधरी गु्रपले जनाएको छ ।

‘चौधरी ग्रुप साझेदारसँग मिलेर नेपालमा क्याम्पा कोला ब्रान्ड ल्याउन पाउँदा उत्साहित  आरसीपीएलका कार्यकारी निर्देशक केतन मोदीले बताए । ‘क्याम्पा कोला ५० वर्षभन्दा पुरानो ऐतिहासिक भारतीय ब्रान्ड रहेको उल्लेख गदै उनले यस किसिमको सहकार्यवाट बहुराष्ट्रिय कम्पनीहरुको लगानी प्रर्वद्धन हुने विश्वास ब्यक्त गरेका छन् । 

नेपालमा क्याम्पा कोला ल्याउन रिलायन्ससँग सहकार्य गर्नु र समग्र देशका लागि राम्रो अवसर भएको रिलायन्स इण्डस्ट्रिज र चौधरी गु्रप प्रतिनिधिहरुले जनाएका छन् ।