ओखलढुङ्गा । बढ्दो बजारीकरणसँगै सुरक्षा व्यवस्थालाई नयाँ रूप दिन, अब ग्रामीण भेगमै पनि प्रविधिको सहारा लिन थालिएको छ । कतिसम्म भने नेपालका पहाडी जिल्लाहरुमा समेत सीसीटीभीको निगरानी प्रचलन बढेको छ । 

सीसीटीभी कुनैपनि क्षेत्रको प्रत्यक्ष निगरानी गर्न सकिने प्रविधि । अचेल शहर बजारका प्राय सबै ठाउँमा सीसीटीभी प्रयोग देखिन्छ नै । शहर बजारमा मात्रै होइन, अहिले त गाउँघरमा समेत सीसीटीभी जडानको प्रचल बढेको छ । सुरक्षा निगरानी बढाउन सीसीटीभी जडान अभ्यास पहाडी जिल्ला ओखलढुंगामा समेत बढेको छ । ओखलढुंगाको मोलुङ गाउँपालिका–२ स्थित रामपुर बजारमा, सुरक्षित र अनुशासित वातावरण निर्माण गर्ने लक्ष्यसहित सिसिटिभी निगरानी प्रणाली सञ्चालनमा ल्याइएको हो । 

रामपुर बजार ग्रामिण भेगका लागि मुख्य व्यापारिक केन्द्र मानिन्छ । बढ्दो बजारिकरण संगै आपराधिक घटना पनि बृद्धि हुनसक्ने सम्भावनालाई आँकलन गर्दै स्थानीय सरकार अहिले सजग देखिएको छ । सार्वजनिक सुरक्षामा प्रविधिको प्रयोगमार्फत, सम्भावित आपराधिक गतिविधिहरूको निगरानी र नियन्त्रणमा ल्याउने उद्देश्यले बजार क्षेत्रमा पहिलो पटक सिसिटिभी क्यामराबाट निगरानी सुरु गरिएको हो । 

सीसीटीभीबाट संकलित दृश्यहरू प्रत्यक्ष रूपमा ईलाका प्रहरी कार्यालयमा स्थापना गरिएको कन्ट्रोल रुमको मोनिटरमा देखिने छ । त्यहीँबाट सम्पूर्ण निगरानी र सञ्चालन कार्यको प्राविधिक संयोजन गरिने व्यवस्था मिलाइएको छ । आवश्यकता अनुसार प्रहरीले वास्तविक समयमा बजार क्षेत्रको सम्पूर्ण गतिविधि अवलोकन गरी तुरुन्त कारबाही गर्न सक्ने सुविधा प्राप्त हुने भएकाले, यसलाई ग्रामीण भेगमै आधुनिक सुरक्षा व्यवस्थापनको प्रभावकारी उदाहरणका रूपमा हेरिएको छ ।

सिसिटिभी क्यामेरा जडानसँगै स्थानीय बासिन्दा मात्र होइन, व्यवसायीहरू पनि उत्साहित देखिएका छन् । यसले बजारमा सुरक्षाको भरोसा बढाएको छ भने अब कारोबार अझ सहज, निर्धक्क र व्यवस्थित रूपमा सञ्चालन गर्न सकिने अवस्था सिर्जना भएको छ । 
 
स्थानीय सरकार, सुरक्षा निकाय र समुदायबीचको सहकार्यको परिणामस्वरूप ग्रामीण बजारमा यी र यस्ता खाले आधुनिक प्रविधिको प्रयोगले सकारात्मक परिवर्तनको थालनी भएको देखिन्छ ।