काठमाडौं । चन्द्रागिरि नगरपालिका वडा नम्बर १३ बालश्रम मुक्त वडा भएको छ । शुुक्रबार वडा १३ को प्रागंणमा एक कार्यक्रम गरि चन्द्रागिरि नगरपालिकाका प्रमुख घनश्याम गिरीले  वालश्रम मुक्त वडा घोषणा गरेका हुन् । कार्यक्रममा बोल्दै नगर प्रमुख गिरीले समग्र नगरपालिकालाई नै बालश्रम मुक्त घोषणा गर्ने अभियान जारी रहेको  नगरमा अब दुई वटा वडामात्र बालश्रम मुक्त वडा घोषणा  हुन बाँकी रहेको बताए । त्यस्तै वडा अध्यक्ष श्रीकृष्ण खत्रीले वडालाई बालश्रम मुक्त घोषणा गर्न सबै निकायहरुको सहयोग रहेको बताए । 

उनले भने, 'हामीले यो अभियान सफल बनाउन अभिमुखिकरण कार्यक्रमहरु पनि सञ्चालन गरेका थियौँ, सबै निकायहरुको सहयोग पनि रह्यो,  हामीले वडा भित्र पटक पटक अनुगमन गरेका थियौँ, अनुगमन क्रममा वडाक्षेत्र भित्र सञ्चालित उद्योग कारखानाहरुबाट ३ जना बालकहरुलाई उद्धार गरी कागज गराई पठाएका छौ, बालबालिकालाई काममा नलगाउन सचेत समेत गराएका छौँ ।'

चन्द्रागिरि नगरपालिका आफ्नो नगरलाई बालश्रम मुक्त बनाउने अभियान प्राथमिकतामा राखेको जनाएको छ ।  अधिकासं वडालाई बालश्रम मुक्त घोषणा गरिसकेको छ भने केही वडाहरू घोषणा गर्ने तयारी भइरहेको नगरपालिकाले जनाएको छ । 

बालश्रम मुक्त वडा घोषणा अघि बालबालिकाहरुले प्लेकार्डसहित र्याली निकालेका थिए । कार्यक्रममा नगरप्रमुख, उपप्रमुख,  वडाका जनप्रतिनिधि,शिक्षा बिभागका प्रमुख, शिक्षक बिद्यार्थी तथा स्थानीहरुको सहभागिता रहेको थियो ।