काठमाडौं । नेपाल बौद्ध धर्म संरक्षण संघको १९ औँ साधारणसभा तथा ९ औँ अधिवेशन सम्पन्न भएको छ । बुधवार काठमाडौँको तिनचुलीस्थित नेपाल बौद्ध महासंघको सभा हलमा सम्पन्न अधिवेशनबाट टासीग्याल्जेन शेर्पा (मिथुन भोटे)को नेतृत्वमा नेपाल बौद्ध धर्म संरक्षण संघको विधानत: नयाँ कार्यसमिति चयन भएको हो । 

निर्वाचन समितिका संयोजक अधिवक्ता गोपाल प्रसाद भण्डारी नेत्तृत्वको निर्वाचन समितिले १३ जनाको नयाँ कार्यसमिति सर्वसहमतिमा चयन गरेको हो । संघको उपाध्यक्षमा जाङबु शेर्पा, महासचिवमा उमा गुरूङ, सचिबमा भिम बहादुर लामा, कोषाध्यक्षमा पासाङ शेर्पा छेल्हामू, र सह–कोषाध्यक्षमा विनिता मगर चयन भएका छन् । त्यस्तै कार्यसमितिको सदस्यहरूमा विनोद महर्जन, याङला शेर्पा, पेम्बा डोल्मा ह्योल्मो, सुरज खड्का, हरिश लामा, सिमाना पौडेल र निर्मला गुरूङ चयन भएका छन् ।

कार्यक्रमलाई सम्बोधन गर्दै प्रमुख अतिथि तथा नेपाल बौद्ध महासंघका अध्यक्ष गेशे नुरबु थुन्डु शेर्पाले मानव समाजको अस्तित्व जोगाउन बौद्ध धर्मको संरक्षण अनिवार्य रहेको बताएका छन् । बौद्ध धर्मले मानव जगतलाई व्यवहारिक ज्ञान, अनुशासन र मार्ग दर्शन सिकाउने भएकोले संरक्षण र प्रचारमा ध्यान दिनुपर्ने उनले बताए । बौद्ध धर्मको प्रचारप्रसारलाई व्यापकता दिन संघको नयाँ कार्यसमितिले कार्य सम्पादन गर्नेमा विश्वास व्यक्त गर्दै नेपाल बौद्ध महासंघको पनि साथ र सहयोग रहने प्रतिबद्धता व्यक्त गरेका छन् । 

नेपाल बौद्ध धर्म संरक्षण संघका संस्थापक अध्यक्ष युवराज लामा ह्योल्मोले पनि नयाँ कार्यसमितिलाई पद हस्तान्तरण गर्दै संस्थाको उद्देश्यअनुरूप कार्य सम्पादन गर्न सुझाव दिए । संघ दर्ता गर्दा अहिलेको माग सुहाउँदो उद्देश्य रहेको उल्लेख गर्दै उनले सामाजिक उत्तरदायित्व बहन गरि धर्म संरक्षणका लागि जागारण आवश्यक रहेको बताए ।

महाधिवेशनकै अवसरमा कार्यसमिति सदस्य सुरज खड्काले संघको औचित्य र आवश्यकताबारे स्पष्ट पार्दै संघले बौद्ध धर्मको संरक्षण र प्रवद्र्धनका लागि विभिन्न कार्यक्रम सञ्चालन गर्ने तथा बौद्ध धर्म र दर्शनलाई आम मानिससम्म जोड्न सँधै प्रयत्नशील रहने प्रतिबद्धता व्यक्त गरे । नेपाल बौद्ध धर्म संरक्षण संघ बौद्ध धर्मको संरक्षण र सम्बद्र्धन गर्ने प्रमुख संस्था हो ।