News 24 Television
वीर अस्पतालसंगै स्थापना भएको जलेश्वरको प्रादेशिक अस्पताल किन जर्जर ?

महोत्तरी । महोत्तरीको सदरमुकाम जलेश्वरस्थित प्रादेशिक अस्पताल जलेश्वरमा जेनजी युवाहरुले भ्रष्टाचार र अनियमितता भएको भन्दै प्रदर्शन गरेका छन । उनीहरुले अस्पतालको खस्किदो सेवा प्रवाहलाई लक्षित गर्दै विभिन्न ११ बुँदे माग राखेका छन् । शुक्रवार अस्पतालका मेडिकल सुपरिटेण्डेन्टसँग छलफल समेत गरेका छन्  ।

महोत्तरीको प्रादेशिक अस्पताल जलेश्वरमा खस्किदो सेवाप्रवाहलाई लक्षित गर्दै जेनजी प्रतिनिधिहरुले विभिन्न ११ बुँदे माग बुझाउदै प्रदर्शन गरेका छन् । 

कर्मचारी नियुक्तिमा अनियमितता, गाइनोलोजिष्ट तथा एमडिजीपी डाक्टर नहुदाँ प्रसुति भएका महिला रेफर हुनु, सरकारले निःशुल्क गरेको औषधी नपाइनु, दरबन्दी सय वेडको तर त्यो सञ्चालन नहुनु जस्ता कमी कमजोरी लगायत आर ओ प्लान्टमा अनियमितता, वेंटिलेटर संचालन नभएको, कार्यालय सहयोगीले ड्रेसिंङ र एक्सरे गर्र्नेे, डायलाईसिस सेवा संचालन नहुनु, अनुशासनहिन सुरक्षा गार्ड, सामान्य सिरिंज अस्पताल बाहिरबाट किन्न लगाउनु, अस्पतालमा सरसफाई लगायत अस्पताल संचालन तथा व्यस्थापन समिति अध्यक्षले गरेको अनियमिततालाई लिएर जेनजी युवाहरुले प्रदर्शन गरेका छन् । 

स्वास्थ्य सेवा दिने संस्थाप्रति आम नागरिक जागरूक हुनु आवश्यक रहेको र राजनीतिक सक्रियताले गर्दा अस्पतालको दुर्दशा भएको भन्दै युवाहरुले प्रदर्शन गरेका हुन् । 

प्रादेशिक अस्पताल जलेश्वरमा डोर हाजिरीमैं दक्ष कर्मचारी नियुक्ति नभएको र उक्त नियुक्ति व्यस्थापन समिति अध्यक्षले नै गरेकाले व्यवस्थापकले जस्तो कर्मचारी दिएको हो त्यही अनुसार काम लगाएको अस्पतालकै एक्सरे फाँटमा कार्यरत कर्मचारीले स्वीकारेका छन ।

यता प्रादेशिक अस्पताल जलेश्वरका निमित्त प्रमुख डॉ विकासकुमार साहले मधेश प्रदेश सरकार र निर्देशनालयले दिदै आएको कर्मचारी लगायत अन्य सुविधाहरु अनुसार नै सेवाप्रवाह गर्दै आएको बताए ।  

प्रादेशिक अस्पताल जलेश्वर महोत्तरीमा सदरमुकाम वरिपरिको क्षेत्रसँगै भारतबाट समेत विरामी आउने र आकस्मिक सेवा दिनुपर्नेमा अस्पतालको खस्किदो सेवा उकास्न सम्बन्धित निकाय गम्भीर नदेखिएको स्थानियको गुनासो छ । अस्पताल व्यस्थापन, प्रदेश सरकार र कार्यान्वयन गर्ने निकायको ढीलासुस्तीले काठमाण्डौस्थित वीर अस्पतालसँगै स्थापना भएको अस्पताल जर्जर हुन पुगेको छ ।

प्रकाशित मिति: शनिबार, मंसिर १३, २०८२  ०८:०२
प्रतिक्रिया दिनुहोस्
Weather Update