पोखरा । नेपाल पर्यटन बोर्डको बोर्ड सदस्यमा गृहमन्त्री रमेश लेखकका भान्जा वर्ने नरेन्द्र भट्टलाई नियुक्त गरिएको छ । भट्ट सहित कुमार थपलिया पनि नियुक्त भएका छन् ।
संस्कृति पर्यटन तथा नागरिक उड्डयन मन्त्री बद्री पाण्डेले गठन गरेको समितिको सिफारिसका आधारमा भट्ट र थपलिया बोर्ड सदस्य नियुक्त भएका हुन् ।
थपलिया नेपाल नेपाल एशोसियसन अफ टुर एण्ड ट्राभल्स एजेण्ट्स (नाट्टा) अध्यक्ष हुन् भने भट्ट गृहमन्त्री रमेश लेखकका नातामा भान्जा पर्छन् । थपलियाको नियुक्ति भने विवादमा परेको छ ।
पर्यटन बोर्डबाटै अनुदान तथा पैसा लिएर चल्ने संस्था नाटाको अध्यक्षलाई बोर्ड सदस्य नियुक्त गर्दा स्वार्थको द्वन्द्व हुने भन्दै व्यवसायीले विरोध गरेका छन् ।
यसअघिका बोर्ड सदस्य मदन आचार्य र मिलन देवकोटाको रिक्त ठाउँमा कांग्रेसकै दुई सदस्य नियुक्त भएका हुन् । उनीहरुलाई मन्त्रीस्तरीय निर्णयबाट विहीबार नियुक्ति दिइएको मन्त्रालयले जनाएको छ । पर्यटन मन्त्री बद्री पाण्डेको यो निर्णय विवादमा परेको छ ।
यता देशको पर्यटकिय राजधानी पोखराले एकजना पनि बोर्ड सदस्य नपाँउदा पोखरेली पर्यटन व्यवसायी रुष्ट भएका छन् । पोखरा पर्यटन परिषदका अध्यक्ष तारानाथ पहारीले यो निर्णयबाट पोखरालाई उपेक्षा गरिएको बताए ।
यसअघि पर्यटन बोर्डको रिक्त रहेको सदस्यमा पोखराको उपस्थिति अनिवार्य हुनुपर्ने भन्दै पर्यटन मन्त्री पाण्डेको गम्भीर ध्यानाकर्षण गराएको थियो ।
