
काठमाडौँ । नेपाल शाकाहारी संघद्वारा आयोजित ३ दिने ‘अहिंसा महोत्सव नेपाल’ (अहिंसा फेस्टिभल नेपाल) कार्यक्रम भब्य रुपमा सम्पन्न भएको छ । महोत्सव विगत १२ गते बिहीवारदेखि १४ गते शनिबार, तदनुसार अगस्ट २८ देखि ३० तारिखसम्म देशीविदेशी हजारौं नागरिकहरुको बाग्लो उपस्थितिमा बिहान १० बजेदेखि बेलुकी साझ ६ बजेसम्म निरन्तर ३ दिन नेपाल प्रहरी क्लब प्रदर्शनीमार्ग, भृकुटीमण्डप काठमाडौँमा सम्पन्न भएको हो ।
नेपाल सरकारका पुर्व अर्थमन्त्री तथा सांसद प्रकाश शरण महतको प्रमुख आतिथ्यता र नेपाल शाकाहारी संघको अध्यक्ष कृष्ण गुरुङको अध्यक्षतामा सम्पन्न ३ दिने अहिंसा महोत्सवमा करिब ६ हजार देशीविदेशी पाहुनाहरुको व्यापक उपस्थितिमा महोत्सव सम्पन्न भएको हो । अहिंसाका मूल्य र शाकाहारी जीवनशैलीमा रुचि राख्ने पशुमुक्ति अभियन्ता, विभिन्न संघसंस्था र समुदायलाई जोड्ने महोत्सवले अपेक्षा राखेको थियो । ३ दिने महोत्सवमा दिगो जीवन पद्धति, शाकाहारी जीवनशैली र पशु अधिकार सम्बन्धी अन्तरक्रिया समेत रहेको थियो ।
त्यस्तै, कार्यक्रममा भरतनाट्यम नृत्य लगायत साङगीतिक प्रस्तुति, योग सत्र, देश-विदेशका अभियन्ताहरुसँग प्रत्यक्ष भेटघाट र अनुभव आदानप्रदान, शाकाहारी परिकार तथा पकाउने विधिको प्रदर्शन रहेको थियो । महोत्सवमा पूर्ण शाकाहारी (भिगन) खानाहरूको समेत स्टलहरु रहेको थियो । केहि स्टलमा निःशुल्क रूपमा भिगन खाना चाख्ने स्किमको समेत आयोजकले व्यवस्था गरेको थियो ।
'करुणाले जोड्छ’ भन्ने मुल नारासहित सम्पन्न भएको महोत्सवमा सबैका लागि निःशुल्क प्रवेशको व्यवस्था गरिएको थियो । पशुपंक्षी प्रेम, मानव स्वास्थ्यको ख्याल गर्ने र पृथ्वी अर्थात् वातावरणको हितका लागि ‘पूर्ण शाकाहारी’ जीवनशैली प्रवर्द्धनार्थ महोत्सवको मुख्य उदेश्य रहेको थियो । सबैको साथ र सहयोगले गर्दा महोत्सवको आफ्नो उदेश्य पुर्ण रुपमा पूरा गरेको अध्यक्ष कृष्ण गुरुङले बताएका छन् ।
महोत्सवमा खाना लगायत शाकाहारी उत्पादनका ६० भन्दा बढी कक्ष, ४० भन्दा बढी वक्ता र २० भन्दा बढी सहभागी संस्था रहेको थियो । जसमा अन्तर्राष्ट्रिय वक्ताहरूसमेत रहेको थियो । शाकाहार र अहिंसा प्रवर्द्धनको क्षेत्रमा शाकाहारी संघ झन्डै दुई दशकयता नेपालभित्र अनेकन् गतिविधिमा क्रियाशील रहेको छ ।