एजेन्सी । अमेरिकी राष्ट्रपति डोनाल्ड ट्रम्पले संयुक्त राज्य अमेरिकाले गाजा नियन्त्रण लिन र प्यालेस्टिनीहरूलाई स्थानान्तरण गर्नसक्ने सुझाव दिएपछि कब्जा गरिएका प्यालेस्टिनी क्षेत्रहरूमा व्यापक निन्दा भएको छ ।

गाजाका बासिन्दा र नेताहरूले आफ्नो मातृभूमिबाट कुनैपनि विस्थापनको प्रतिरोध गर्ने प्रतिवद्धता गरेका छन् । इजरायली प्रधानमन्त्री बेन्जामिन नेतान्याहुसँगै बोल्दै ट्रम्पले अमेरिकाले गाजा पट्टीको नियन्त्रण लिने र यसलाई पुनर्विकास गर्ने बताएका थिए । यद्यपि उनले प्यालेस्टिनीहरूलाई कसरी पुनर्स्थापित गर्न सकिन्छ भन्ने बारेमा कुनै विवरण दिएनन् । 

प्यालेस्टिनी राष्ट्रपति महमूद अब्बासले ट्रम्पको टिप्पणीलाई अन्तर्राष्ट्रिय कानूनको स्पष्ट उल्लङ्घन भनेर अस्वीकार गरेका छन् । उनले आफ्नो भूमिमा आफनो उपस्थिति विदेशबाट आउने कुनै पनि निर्णयको अधिनमा नरहेको बताए । 

ट्रम्पकाे उक्त अभिव्यक्तिविरूद्ध संयुक्त राष्ट्र संघले समेत आपत्ति जनाएकाे छ । गाजाबाट मानिसलाई जबर्जस्ती विस्थापन गर्ने वा कुनै पनि प्रकारको जातीय सफायाको योजना विरुद्ध रहेको राष्ट संघका प्रवक्ता स्टेफेन दुजार्रीले बताएका छन् । 

उता, जोर्डनका राजा अब्दुल्लाह द्वितीयले गाजा र पश्चिमी किनारमा प्यालेस्टिनीहरूकाे भूमि कब्जा गर्ने वा विस्थापित गर्ने कुनै पनि प्रयासलाई अस्वीकार गर्ने बताएका छन् । प्यालेस्टिनीहरू आफ्नो भूमिमा रहन सुनिश्चित गर्ने महत्वमा जोड दिँदै राजाले अम्मानमा प्यालेस्टिनी राष्ट्रपति महमुद अब्बाससँगको भेटमा उक्त टिप्पणी गरेका हुन् । जसमा उनले दुई–राज्य समाधानमा आधारित न्यायपूर्ण र व्यापक शान्ति प्राप्त गर्ने आवश्यकतालाई पुनः पुष्टि गरे । 

राजाले प्यालेस्टिनी जनताको वैध अधिकार सुरक्षित गर्न जोर्डनको अटुट समर्थन दोहोर्याएका छन् । गाजामा युद्धविराम कायम राख्नुको महत्वलाई पुनः पुष्टि गर्दै राजाले मानवीय सहायता बढाउन र गाजापट्टीका सबै क्षेत्रहरूमा यसको वितरण सुनिश्चित गर्न अन्तर्राष्ट्रिय प्रयासहरूलाई तिब्र बनाउन आह्वान समेत गरेका छन् ।

टर्कीका राष्ट्रपति रेसेप तैयप एर्दोगान र जर्मन राष्ट्रपति फ्रान्क–वाल्टर स्टेनमेयरले पनि गाजाबाट प्यालेस्टिनीहरूलाई विस्थापित गर्ने प्रश्तावलाई संयुक्त रूपमा अस्वीकार गरेका छन् । हालैका अमेरिकी सुझावहरूको विरोधमा दुई–राज्यले समाधानको लागि आफ्नो समर्थनलाई पुनः पुष्टि गरेका हुन् ।

गाजा पट्टीबाट प्यालेस्टिनीहरूलाई निर्वासन वा निर्वासन गर्ने प्रश्तावहरू अन्तर्राष्ट्रिय कानून अन्तर्गत अस्वीकार्य रहेको उनीहरुले बताए । स्टेनमेयरले अमेरिकी राष्ट्रपति डोनाल्ड ट्रम्पले गाजामा लाखौं प्यालेस्टिनीहरूलाई स्थानान्तरण गर्न गरेको प्रश्ताव स्वीकार नरहेको उनीहरूकाे धारणा छ ।

जर्मन राष्ट्रपतिले दुई–राज्य समाधानको लागि आफ्नो देशको निरन्तर समर्थनमा जोड दिए । एर्दोगानले सिरिया, गाजा र युक्रेनमा क्षेत्रीय सहयोगको बारेमा छलफल गर्दा युद्धविराम कायम राख्ने र दुई–राज्य समाधान कार्यान्वयन गर्ने दिशामा काम गर्ने अन्तर्राष्ट्रिय समुदायको जिम्मेवारीलाई जोड दिए ।  

 इजिप्टका राष्ट्रपति अब्देल फताह अल–सिसीले पनि ट्रम्पको प्रस्तावको निन्दा गरेका छन् । बुधबार एक पत्रकार सम्मेलनमा उनले प्यालेस्टिनीहरूको विस्थापनबारे अहिले जे भनिँदै छ, त्यसलाई कहिल्यै स्वीकार्न नसकिने बताए । यसको प्रभाव इजिप्टको राष्ट्रिय सुरक्षामा समेत पर्ने उनको भनाइ थियो । साथै प्यालेस्टिनी जनताको निर्वासन वा विस्थापन घोर अन्याय हुने र त्यस कार्यमा आफूहरू अनुमति दिन नसक्ने बताए ।