काठमाडौं । काठमाडौं महानगरपालिकाले विद्यार्थीहरूका लागि छात्रवृत्ति वितरण गर्ने उद्देश्यले अनलाइन आवेदन प्रक्रिया सुरु गरेको छ । आर्थिक रूपमा कमजोर, होनहार र अवसरको खोजीमा रहेका विद्यार्थीहरूका लागि यो सुनौलो अवसर बन्ने छ ।
काठमाडौं महानगरपालिकाले आफ्नो क्षेत्रभित्रका सामुदायिक तथा संस्थागत विद्यालयमा कक्षा ११ र १२ मा अध्ययन गर्न चाहनेहरुका लागि छात्रवृत्ति दिलाउने भएको छ । महानगरले एक सूचना जारी गर्दै शैक्षिक सत्र २०८२÷०८३ का लागि परीक्षा प्रणालीमार्फत छात्रवृत्ति उपलब्ध गराउने जनाएको हो ।
इच्छुक विद्यार्थीहरूले १८ असारदेखि २७ असारसम्म अनलाइन आवेदन फाराम भर्न सक्ने सूचनामा जनाइएको छ । प्रवेश परीक्षा भने आगामी ३ साउन बिहान ८ बजेदेखि १० बजेसम्म सञ्चालन हुने जनाइएको छ । परीक्षामा माध्यमिक तह कक्षा १० को पाठ्यक्रममा आधारित एक सय वटा वस्तुगत बहुवैकल्पिक प्रश्नहरू सोधिने महानगरले जनाएको छ ।
अनलाइन फाराम कसरी भर्ने ?
– महानगरको वेवसाइट खोल्नुहोस् ।
– ‘एप्लाई स्कलरसीप’ बटनमा क्लिक गर्नुहोस् ।
– आवश्यक योग्यता र निर्देशनहरू पढिसकेपछि ‘नेक्सट’ बटन थिच्नुहोस् ।
– विवरणहरू भरेर आवश्यक कागजातहरू अपलोड गर्नुहोस् ।
– फाराम सबमिट गर्नु अघि पुनरावलोकन गर्न सकिने सुविधा उपलब्ध छ ।
अनलाइन आवेदनका लागि आवश्यक कागजातहरू
– एसईईको प्रवेश पत्र
– हालसालै खिचिएको पासपोर्ट साइज फोटो
– नागरिकता वा जन्मदर्ताको प्रमाणपत्र
– एसईई वा सो सरहको मार्कसिट र चारित्रिक प्रमाणपत्र
– सामुदायिक विद्यालयमा अध्ययन गरेका भए सो सम्बन्धी सिफारिस
– संस्थागत विद्यालयमा छात्रवृत्तिमा अध्ययन गरेकाको सिफारिस
– आरक्षणका लागि आवश्यक कागजातहरू
यदि आवेदन पेस गरेपछि जानकारीमा त्रुटि देखिएको खण्डमा, महानगरलाई इमेलमार्फत अनुरोध गरेपछि मात्र सच्याउने सुविधा उपलब्ध हुनेछ ।
न्यूनतम योग्यता
– एसईई परीक्षा कम्तीमा १.६ जीपीए सहित उत्तीर्ण
– सामुदायिक विद्यालयबाट एसईई उत्तीर्ण
– काठमाडौं महानगरपालिकाको स्थायी बासिन्दा (नागरिकता, जन्मदर्ता वा बसाइँसराइ प्रमाण)
– ल्याण्डफिल्ड साइट प्रभावित क्षेत्र (नुवाकोटको ककनी गाउँपालिका वडा १, २, ३ र धादिङको धुनिवेशी नगरपालिका वडा १, ३, ४) का स्थायी बासिन्दा
– संस्थागत विद्यालयमा छात्रवृत्तिमा अध्ययन गरेको प्रमाण
छात्रवृत्ति कोटा विवरण
– सामुदायिक विद्यालयमा अध्ययन गरेका विद्यार्थीलाई ४० प्रतिशत
– संस्थागत विद्यालयमा छात्रवृत्तिमा अध्ययन गरेका विद्यार्थीलाई ५ प्रतिशत
– काठमाडौं महानगरपालिका भित्र स्थायी बसोबास भएका सबै विद्यार्थीका लागि १४ प्रतिशत
– ल्याण्डफिल्ड साइट प्रभावित क्षेत्रको स्थायी बासिन्दा सामूदायिक र संस्थागत विद्यालयमा अध्ययन गरेकाको हकमा १ प्रतिशत
काठमाडौं महानगरपालिकाको यो पहलले शैक्षिक समानताको सिद्धान्तलाई मूर्तरूप दिन महत्त्वपूर्ण भूमिका खेल्नेछ । आर्थिक, सामाजिक तथा भौगोलिक आधारमा वञ्चित विद्यार्थीहरूलाई अवसर प्रदान गर्दै शिक्षामा पहुँच अभिवृद्धि गर्ने उद्देश्यले छात्रवृत्ति कार्यक्रम प्रभावकारी हुने अपेक्षा गरिएको छ ।
