काठमाडौँ । हामी र हाम्रो कृति समाजको २३औँ प्रकाशन कवि सरस्वती भित्रकोटीद्वारा लिखित मुक्तकसङ्ग्रह ‘प्रेमपत्र’ सार्वजनिक भएको छ ।
शनिबार बालुवाटारस्थित लीलाध्वज थापा साहित्य प्रतिष्ठानको सभाहलमा कवि/साहित्यकार तथा हामी र हाम्रो कृति समाजका आजीवन सदस्य कर्ण दयाल ‘सोराडी’को अध्यक्षतामा उक्त कृतिको विमाचन गरिएको हो । नेपाल मुक्तक प्रतिष्ठानका उपाध्यक्ष एवं वरिष्ठ साहित्यकार वियोगी बुढाथोकीको प्रमुख आतिथ्यमा सम्पन्न उक्त कार्यक्रममा हामी र हाम्रो कृति समाजका संस्थापक सचिव बद्री उप्रेतीले स्वागत मन्तव्य राखेका थिए ।
राजनीतिक विश्लेषक, इतिहासविद् तथा वरिष्ठ समालोचक प्रा.डा. गोविन्द मानसिंह कार्कीले कृतिका बारेमा व्याख्या र विश्लेषण गरेका थिए । कृतिकार सरस्वती भित्रकोटीले छोटो समयमा पुस्तक तयार पारेर लोकार्पण गरिदिएकोमा हामी र हाम्रो कृति समाजका सम्पूर्ण टिमप्रति आभार व्यक्त गर्दै आफ्नो मन्तव्य राखिन् ।
संस्थाका अध्यक्ष मदनप्रसाद नेपालले मन्तव्य राख्दै संस्थाले गर्दै आएका र भावी कार्यक्रमका बारेमा अवगत गराउनुका साथै उक्त संस्थालाई विश्वास गर्ने समस्त सर्जकहरूको कृति प्रकाशन तथा विमोचनका आफूहरू सदैव तयार रहेको विश्वास दिलाए । त्यसैगरी प्रमुख अतिथि वियोगी बुढाथोकी र विशिष्ट अतिथि विजयध्वज थापाले हामी र हाम्रो कृति समाजले साहित्यको उन्नयनका निम्ति गरेको कार्यप्रति प्रशंसा गर्दै यसको निरन्तरताको कामना गरे ।
त्यसैगरी विशिष्ट अतिथिको आसनमा लीलाध्वज थापा साहित्य प्रतिष्ठानका अध्यक्ष वरिष्ठ साहित्यकार विजयध्वज थापा साथै अतिथिको आसनमा हातेमालो साहित्य संगमका अध्यक्ष सुनिल अधिकारी र कृतिकारका दाजु नरेन्द्र भित्रकोटी रहेका थिए । उनीहरुले पनि आआफ्नो मन्तव्य राखे ।
त्यसैगरी शुभकामना मन्तव्य दिनुहुनेहरूमा सुनिल अधिकारी र नरेन्द्र भित्रकोटीले कृतिकारलाई बधाई दिँदै हामी र हाम्रो कृति समाजले गरेको कार्यप्रति प्रशंसा गरे । संगीता खरेलले कार्यक्रमको रमाइलो तरीकाले सञ्चालन गरेकी थिइन् ।
लगभग ५५ जना उपस्थित साहित्यकारहरूमध्येबाट रचना वाचन गर्नेहरूमा मानन्धर अभागी, तिलक गाउँले, शशीश्री आचार्य, प्रमुना दहाल, दल बहादुर नेपाली, निना श्रेष्ठ, मीना चौलागाईं, नानु राणा थापा, डिल्ली भुषाल, कृष्ण कुमार वैद्य, नम्रता उप्रेती, बद्री उप्रेती, गीता अर्याल, सुजन डोटेल, नारायण विश्वकर्मा, रामेश्वर के.सी. लब खड्का, रन बहादुर बुढाथोकी र उदयराज भण्डारीले विमोचित कृतिबाट र आआफ्ना मौलिक रचनाहरू समेत वाचन गरे ।
अन्त्यमा कार्यक्रमका सभाध्यक्ष कर्ण दयाल ‘सोराडी’ले उक्त कार्यक्रम ऐतिहासिक भएको र विमोचित कृति नेपाली साहित्यको भण्डारमा उदाहरणीय दस्तावेजको रूपमा रहने कुरामा दुईमत नरहेको बताए । उक्त कृतिका कृतिकार सरस्वती भित्रकोटीलाई बाधाई तथा शुभकामना दिँदै कार्यक्रमलाई सभ्य र भव्य रूपमा सम्पन्न गराउन उपस्थित भएका सम्पूर्णप्रति उनले आभार प्रकट गरे ।
