काठमाडौं । यहाँको टोखा नगरपालिका- ७ स्थित दाहालगौंडा क्षेत्रको अतिक्रमित जग्गा काठमाडौं उपत्यका विकास प्राधिकरणले खाली गरेको छ ।
स्थानीय जनप्रतिनिधिसहितको संलग्नतामा अतिक्रमण भएको झण्डै ४ रोपनी क्षेत्रफलको जग्गामा भएका घरटहराहरु प्राधिकरणले सोमवार डोजर लगाएर हटाएको हो ।
यसअघि पनि प्राधिकरणका काठमाडौं जिल्ला आयुक्त इन्जिनियर सुवास बस्नेतले अग्रसरता देखाएका थिए । तर जनप्रतिनिधिकै सेटिङमा बस्नेतलाई सरुवा गरिएको थियो । बस्नेतले गत भदौ ३१ गते उक्त अतिक्रमित क्षेत्र खाली गर्ने प्रयास स्वरुप काठमाडौंका प्रमुख जिल्ला अधिकारीलाई सुरक्षाको प्रबन्ध मिलाइदिन आग्रह गरेका थिए ।
टोखा नगरपालिका- ७ का वडाध्यक्ष नरोत्तम रानाले सरकारी जग्गा अतिक्रमण गरी घर-टहरा बनाई भाडामा लगाउँदै आएका थिए । सार्वजनिक जग्गा अतिक्रमणको विषयमा अख्तियार दुरुपयोग अनुसन्धान आयोगले समेत चासो देखाउँदै आएको छ । अख्यिारमा परेको उजुरीका आधारमा आयोगले टोखा नगरपालिकाको कार्यालयलाई जग्गा अतिक्रमण सम्बन्धमा रायसहितको कागजात बुझाउन भन्दै पटक पटक ताकेता गर्दै आएको थियो ।
पटक पटक ताकेता गर्दा पनि नगरपालिकाले कागजात नबुझाउँदा छानबिन कार्यमा बाधा पुगेको भन्दै अख्तियारले पछिल्लो पटक जेठ २२ गते छैठौंपटक पत्राचार गरेको थियो । राजनीतिक दलको संरक्षणमा रानाले हडप्दै आएको उक्त जग्गा सोमबार प्राधिकरणले डोजर लगाएर खाली गराएको छ ।
काठमाडौं उपत्यका विकास प्राधिकरणका जिल्ला आयुक्त सुनिता श्रेष्ठले मापदण्डविरितका भौतिक संरचनाहरु हटाउन लागिएको भन्दै नगरपालिका र नगरप्रहरीलाई असहजीकरणका लागि पत्राचार गरेकी थिइन् ।
