काठमाडाैं । नेपालको सर्वाधिक सफल मानिने चर्चित फ्रेन्चाइज फिल्म ‘कबड्डी’को पाँचौँ श्रृंखला ‘कबड्डी ५’ आगामी दशैंको अवसर पारेर प्रदर्शनमा आउने भएको छ। शुक्रबार निर्माता कम्पनी बाँसुरी फिल्म्सले फिल्मको आकर्षक फर्स्टलुक पोस्टर सार्वजनिक गर्दै कात्तिक ६ गते (२३ अक्टोबर) लाई प्रदर्शन मिति घोषणा गरेको हो। यो मिति दशैंको टीकाको पर्सिपल्ट अर्थात् द्वादशीमा पर्दछ।

यसअघि नै दशैंको फूलपाती अघिल्लो दिन (असोज ३०) बाट प्रदर्शनमा आउने गरी ‘छ माया छपक्कै २’, ‘१२ गाउँ २’ र ‘आ बाट आमा २’ ले मिति तय गरिसकेका छन्। यी तीन ठूला फिल्म प्रदर्शनमा आएको ठीक एक सातापछि ‘कबड्डी ५’ पनि हलमा थपिने भएपछि यसपालिको दशैं बक्स अफिसमा निर्माताहरूबिच निकै रोचक र कडा प्रतिस्पर्धा हुने देखिएको छ।

सार्वजनिक पोस्टरमा फिल्मका प्रमुख पात्रहरू काजी (दयाहाङ राई), बिके (विजय बराल) र छन्त्याल (बुद्धि तामाङ) लाई उनीहरूको बहुचर्चित चारित्रिक भेषमा उतारिएको छ। पोस्टरमा दयाहाङ हातमा क्रिकेट ब्याट समातेर चिन्तनशील मुद्रामा देखिएका छन् भने विजय र बुद्धिको हाउभाउले यी तीन घनिष्ट साथीहरूको कथामा अझ रोचक मोड आउने संकेत गर्दछ।

रामबाबु गुरुङको लेखन तथा निर्देशनमा बनेको यस फिल्ममा दयाहाङ, विजय र बुद्धिका साथै विपिन कार्की, रिश्मा गुरुङ, सिर्जना गुरुङ, पुष्कर गुरुङ, कमलमणि नेपाललगायतका कलाकारहरूको अभिनय रहेको छ। रामबाबु गुरुङ, मणिराम पोखरेल, मधु मिजार र विशाल गुरुङ यस फिल्मका निर्माता हुन्।