रुपन्देही । रूपन्देहीको देवदह नगरपालिकाद्वारा सञ्चालित देवदह नगर अस्पतालले एक विशेष समारोहका बीच आफ्नो चौथो वार्षिकोत्सव सम्पन्न गरेको छ। वार्षिकोत्सवका अवसरमा गत आईतबारदेखि अस्पतालले १५ शैयाको अन्तरङ्ग ओपीडी सेवा तथा सुलभ फार्मेसी सेवा औपचारिक रूपमा सञ्चालनमा ल्याएको छ।
नगर प्रमुख एवं अस्पताल व्यवस्थापन समितिका संयोजक ध्रुवप्रसाद खरेलका अनुसार लुम्बिनी नेत्र विज्ञान अध्ययन संस्थानको सहकार्यमा छिट्टै आँखा तथा कान उपचार सेवा सुरु गर्ने तयारी अन्तिम चरणमा पुगेको छ।
नगर उपप्रमुख विद्यालक्ष्मी गुरुङले संघियता कार्यान्वयनपछि रुपन्देहीका १६ स्थानीय तहमध्ये नगर अस्पताल र स्वास्थ्य बिमा कार्यक्रम सञ्चालन गर्ने देवदह पहिलो पालिका भएको बताए ।
२४ सै घण्टा बिमासहितको आकस्मिक सेवा प्रदान गर्दै आएको यस अस्पतालबाट देवदहका साथै छिमेकी तिलोत्तमा, सुनवल र पाल्पाको माथागढीका बासिन्दाले समेत सुलभ र गुणस्तरीय उपचार पाइरहेका छन्।
देवदह स्वास्थ्य चौकीका संस्थापक प्रमुख जयकिसान अधिकारीले २२ वर्ष सेवा गरेको स्मरण गर्दै अस्पताल स्वास्थ्यको हब बन्दै गएकोमा खुसी व्यक्त गरे ।
निमित्त मेडिकल सुपरिटेन्डेन्ट डा. रोशन चौधरीले अस्पतालको सुलभ फार्मेसीबारे जानकारी दिँदै गुणस्तरीय औषधि उपलब्ध गराइने प्रतिबद्धता व्यक्त गरे ।
