कजरिया रमेश टाइल्स लिमिटेडले काठमाडौंको जोरपाटीमा नयाँ शोरूम सञ्चालनमा ल्याएको छ। शिव शक्ति बिजनेस हाउससँगको सहकार्यमा स्थापना गरिएको उक्त शोरूममार्फत कम्पनीले राजधानीमा आफ्नो रिटेल सञ्जाललाई थप विस्तार गरेको जनाएको छ।

कम्पनीका अनुसार नयाँ शोरूमले स्थानीय घरधनी, निर्माण व्यवसायी तथा इन्टेरियर डिजाइनरहरूलाई प्रिमियम फ्लोर तथा वाल टाइल्सको विस्तृत संग्रह प्रत्यक्ष रूपमा अवलोकन र खरिद गर्ने सुविधा प्रदान गर्नेछ।

शोरूमको औपचारिक उद्घाटन असार ८ गते सम्पन्न भएको थियो। उद्घाटन समारोहमा नेपालका पूर्व प्रधानन्यायाधीश प्रकाशमान सिंह राउत, कजरिया रमेश टाइल्स लिमिटेडका निर्देशक हिमांशु अग्रवाल, ब्रान्ड एम्बेसडर दिव्या रायमाझी तथा अन्य विशिष्ट व्यक्तिहरूको उपस्थिति रहेको थियो।

आधुनिक शैलीमा निर्माण गरिएको शोरूमले ग्राहकलाई विभिन्न डिजाइन, फिनिसिङ र साइजका टाइल्स एकै स्थानमा अवलोकन गरी आफ्नो आवश्यकता अनुसार छनोट गर्ने अवसर प्रदान गर्ने कम्पनीको दाबी छ।

कम्पनीका प्रतिनिधिले जोरपाटी, नारायणटार तथा आसपासका तीव्र रूपमा विकास भइरहेका क्षेत्रका ग्राहकलाई गुणस्तरीय र आधुनिक सर्फेसिङ सामग्री सहज रूपमा उपलब्ध गराउने उद्देश्यले शोरूम सञ्चालनमा ल्याइएको बताए।

कजरिया रमेश टाइल्स लिमिटेड नेपालका अग्रणी टाइल्स उत्पादक कम्पनीमध्ये एक मानिन्छ। कम्पनीले अन्तर्राष्ट्रिय मापदण्डअनुसार उत्पादन गर्दै आएको छ भने ISO 9001:2015 र ISO 14001:2015 प्रमाणपत्र प्राप्त गरेको छ। हाल कम्पनीको नेपालभर १०० भन्दा बढी शोरूममार्फत उपस्थिति रहेको छ।

कम्पनीका अनुसार ३,००० भन्दा बढी डिजाइन विकल्पसहित उपलब्ध टाइल्सहरू टिकाउपन, मजबुती तथा आकर्षक डिजाइनका कारण बजारमा लोकप्रिय छन्। नयाँ शोरूम सञ्चालनसँगै काठमाडौं उपत्यकाका ग्राहकलाई कम्पनीका उत्पादन तथा सेवामा थप सहज पहुँच पुग्ने अपेक्षा गरिएको छ।