काठमाडौँ । महालेखापरीक्षक तोयम रायाले अडिट प्रक्रियामा राजनीतिक हस्तक्षेप हुने सांसदहरुको आशंका अस्वीकार गर्दै कार्यालय पूर्णतः स्वतन्त्र रहेको स्पष्ट पारेका छन् ।

आईतवार प्रतिनिधि सभाको सार्वजनिक लेखा समितिको बैठकमा बोल्दै उनले महालेखापरीक्षकको कार्यालय राजनीतिक हस्तक्षेपमुक्त रहेको स्पष्ट पारे । अडिट प्रक्रियामा निष्पक्षता कायम गर्न कार्यालयले कुनै राजनीतिक आग्रह वा दबाब नस्वीकार्ने उनको भनाइ छ ।

समितिका सांसदहरुले छलफलको बेला प्रश्न सोध्ने तर जवाफ नै नसुनी बैठकबाट बाहिरिने गरेको भन्दै उनले असन्तुष्टि समेत जनाए । उनले वर्षमा एक पटक बोलाएर प्रश्नमाथि प्रश्न गर्ने तर उत्तर नसुन्ने प्रवृत्तिलाई पनि आफूले बेरुजु नै भन्ने गरेको भन्दै कटाक्ष समेत गरे ।

रायाले भने, ‘समपरिक्षण गर्दाखेरी राजनीतिक हस्तक्षेप भयो कि भन्ने कुरा उठेको छ यस्तो हुदैन । होइन । किन होइन भने समपरिक्षण गर्दाखेरी महालेखापरीक्षकको कार्यालयमा ती कुनैपनि प्रतिवेदनहरु आउँदैनन् । महालेखा परिक्षकलाई यो हटाउनुस् र यो राख्नुस् भन्ने कुरा हुँदैन । त्यसकारण यसमा शंका नगर्नको लागि म आग्रह गर्न चाहान्छु । हुन त हामी निजामति कर्मचारी एउटा जिल्लामा हुँदा एउटा पार्टीको हुन्छौं, अर्को जिल्लामा जाँदा अर्को पार्टीको हुन्छौं । अहिले नयाँ पार्टीहरुको बाँकी होला नभए सबैमा पुगिसक्या हुन्छन् । मेरो अनुरोध के हो भने प्रत्येक पटक अडिट रिपोर्ट गएपछि तीन–तीन महिनामा छलफल गरौं न । अब पोहोर साल जेठ १७ गते भएको छलफल अब एकवर्षपछि बोलाउनुहुन्छ । अब तीनचोटि बोलाइसकेपछि त मेरो कार्यकाल नै सकिन्छ । अनि एकैचोटि प्रश्न सोध्नुहुन्छ अनि हिड्नुहुन्छ । मेरो अनुभव के रह्या् भने धेरै प्रश्न सोध्नुभयो अनि मैले बोल्ने बेलामा हिँड्नुभयो । यहाँको चलन यस्तै हो भने त मेरो भन्नु केही छैन । नत्र हामी त यसलाई पनि बेरुजु भन्छौँ।’

उनले मुलुकमा आर्थिक सुशासन कायम गर्ने सवालमा महालेखापरीक्षको कायालय प्रतिबद्ध रहेको दाबी गरे ।