काठमाडौं । दशरथ रंगशाला फेरि एक पटक अयोग्य ठहरिएको छ । एएफसीको प्राविधिक तथा अनुगमन टोलीले रंगशाला अयोग्य रहेको ठहर गरेको हो । यसले नेपाली फुटबललाई ठुलो धक्का पुग्ने देखिएको छ । नेपालले एशिया कप छनोटमा भियतनामसँग भदौ ३० र मलेसियासंग असोज २ मा घरेलु मैदान दशरथ रंगशालामा खेल्ने तय थियो । तर मैदान मापदण्ड अनुसारको नभएपछि अवे मैदानमा खेल्नुपर्ने देखिएको हो । यसले रंगशाला संरक्षणको जिम्मेवारी पाएको राखेप माथि नैतिक प्रश्न उठेको छ । यसअघि पनि रंगशालाले अन्तर्राष्ट्रिय मान्यता गुमाएको थियो ।

दशरथ रंगशाला संरक्षणको प्रमुख जिम्मेवारी पछिल्लो समय राष्ट्रिय खेलकुद परिषद् (राखेप)को छ । अखिल नेपाल फुटबल संघ एन्फाबाट संरक्षणको जिम्मेवारी खोसेर राखेपले जिम्मेवारी लिएको थियो । तत्कालिन समयमा विश्वकप छनोटका खेल हुन लाग्दा रंगशालाको गुणस्तर न्युन रहेको भन्दै अवे मैदानमा खेल हुन पुगेको थियो । त्यसपछि नेपाली खेलकुदको सर्वाैच्च निकाय राखेपले रंगशाला संरक्षणको जिम्मेवारी लिएपनि रंगशाला गुणस्तरहिन ठहरिनुले राखेपमाथि नैतिक प्रश्न चिन्ह खडा भएको हो । 

एएफसीले एन्फालाई पठाएको पत्र आफु कहाँ नपुगेको भनी राखेपले यतिसम्मको राखेपले  यतिसम्म गैरजिम्मेवार जवाफ दिएर उम्किन खोजिरहेको छ । यता, अखिल नेपाल फुटबल संघ एन्फाका प्रवक्ता सुरेस शाह प्रष्ट रुपमा एएफसीले रंगशालाको गणस्तर बारे प्रश्नचिन्ह उठाएको बताउँछन् । नेपालले दुई खेल कहाँ खेल्ने भन्ने अन्योलता सिर्जना गरेको स्वीकारोक्ति प्रवक्ता शाहको छ । 

सदस्यसचिव घिसिङ भने भक्तपुरको सुर्यविनायकमा ५० हजार क्षमताको रंगशालालाई प्राथमिकतामा राखेको बताउँछन् । प्रधानमन्त्री केपी शर्मा ओलीले गत साउनमा फिफा फुटबल फर स्कुल कार्यक्रमको उद्घाटनमा सूर्यविनायकमा रंगशाला निर्माणको घोषणा गरेका थिए । निर्माण सम्पन्न हुँदासम्म के गर्ने भन्ने प्रश्नमा भने घिसिङ नाजवाफ छन् ।  

नेपाली पुरुष राष्ट्रिय फुटबल टोलीले अन्तिम पटक सन् २०२३ नोभेम्बर १७ मा यमन विरुद्ध खेलेको थियो । नेपालले फिफा विश्वकप सन् २०२६ को खेल स्वरुप उक्त खेल खेलेको थियो । 

सन् २०२७ एसियन कप छनोटमा नेपाल समूह ‘एफ’मा छ । अहिलेसम्म दुई खेल खेलेको नेपाल अंकविहीन हुँदा ६ अंक सहित मलेसिया शीर्ष स्थानमा छ । नेपालले मलेसिया र लाओससँग हार ब्यहोरिसकेको छ । घरेलु मैदानमा हुुनुपर्ने खेल अवे मैदानमा हुँदा नेपाललाई घाटा त हुने नै छ नेपालको भौतिक संरचनाको दुराअवस्थाबारे अन्तर्राष्ट्रिय समुदायले हेर्ने नजरमा समेत फरक पर्ने देखिन्छ ।