काठमाडौँ । माओवादी केन्द्रका अध्यक्ष पुष्पकमल दाहाल प्रचण्ड आफूलाई वर्तमान व्यवस्थाको जननीका रुपमा उभ्याउने गर्दछन् । उनले यो दावीलाई पछिल्लो समय बढी नै दोहो¥याइरहेका छन् । पार्टीको आन्तरिक कलहका कारण राजनीतिक विचलनमासमेत रहेका उनी माओवादी नै देश बचाउने एकमात्रै पार्टी भएको जिकिर गर्ने गरेका छन् । काँग्रेस एमाले गठबन्धनपछि आफूलाई वर्तमान व्यवस्थाको अझ जिम्मेवार संरक्षक ठान्ने प्रचण्ड माओवादी नरहे देश नै नबँच्नेसम्मको निश्कर्ष सुनाउँछन् ।

 तर के माओवादी मात्रै मुलुक बचाउने दल हो ? अन्य दलहरुले मुलुकको हित चाहेकै छैनन् ? प्रचण्डको यो अभिव्यक्तिहरुले गम्भीर राजनीतिक प्रश्न खडा गरेको छ । अर्कोतर्फ प्रचण्डको यो अभिव्यक्ति जनतालाई प्रभावित गर्न र सेन्टिमेन्ट बटुल्न मात्रै आएको टिप्पणी पनि हुन थालेका छन् । हुनतः माओवादी यतिबेला प्रतिपक्षी कित्तामा छ । प्रचण्डले सत्ता पक्षलाई कमजोर पार्ने रणनीतिले नै वर्तमान व्यवस्थामा माओवादी प्रतिपक्षमा भएपनि सत्ता पक्षकै भएको जिकिर गर्न खोजेका हुन् । उनले दलहरुलाई जवाफ दिँदा मात्रै होइन, पार्टीकै नेता जनार्दन शर्मालाई नै दिएको जवाफमा पनि आफू राजनीतिमा नभए सबै गर्ल्यामगुर्लुम ढलेर देश नै बर्बाद होलाकी भन्ने त्रास रहेको टिप्पणी गरेका थिए । 

रास्वपा बचाउने प्रचण्डको दायित्व !

प्रचण्डले रास्वपा लगायतका दलहरुलाई गणतन्त्रको फुलबारीमा फुलेको सुन्दर फुलको रुपमा व्याख्या गर्छन् । तर अहिले प्रतिपक्षमै रहेको रास्वपा सत्ता पक्षिय दल काँग्रेस–एमालेसँग संघर्षरत छ । सहकारी ठगी प्रकरणमा रास्वपा सभापति रवि लामिछाने कारागारमै छन् । कारागारमुक्त हुन रविले अनेकौँ प्रयास गर्दा सफलता प्राप्त गरेका छैनन्  । यहीबेला कोशीमा पुगेर प्रचण्डले रास्वपा बचाउने जिम्मेवारी पनि आफूमै आएको टिप्पाणी गरे । ओली–देउवा नेतृत्वको गठबन्धन बनेको बेला प्रतिपक्षलाई कमजोर बनाउने खेल भएकाले रास्वपा बचाउने जिम्मेवारी पनि आफूमा आएको प्रचण्डले भनेका छन् । हुनतः प्रचण्ड र रास्वपा सम्बनधमा सुमुधरता सत्ता सहकार्य रहँदादेखि नै सुरु भएको हो । प्रचण्ड नेतृत्वको सरकारमा रवि दुई–दुई पटक उपप्रधानसहित हृहमन्त्री भएका थिए । तर एमाले काँग्रेस गठबन्धनपछि भने उनीहरु प्रतिपक्षी कित्तामा पुगेका छन् । यो कारणले पनि प्रचण्ड रविको पक्षमा खुलेरै लागेका देखिन्छन् ।  

प्रचण्डको ‘रवि-मोह’ किन ? 

रवि लामिछानेले सत्ताबाट बाहिरिँदै गर्दा भनेका थिए, ‘वर्तमान व्यवस्था ल्याउनका लागि लड्न सकेनौँ । तर यो व्यवस्था बचाउन जुनसुकै मूल्य चुकाउन तयार छौँ।’ माओवादी नेतृत्वको सरकार ढल्दै गर्दा रविले यही अभिव्यक्ति दिएका थिए । र, यो अभिव्यक्तिले नै रविसँग माओवादी अध्यक्ष प्रचण्ड प्रभावित भएका छन् । जसका कारण पनि प्रचण्डले रवि कारागारमा रहँद पटक–पटक सहानूभूति प्रकट गर्दै आएका छन् भने उनी रास्वपाको बचाउमासमेत अटल रहँदै आएका छन् । रविमाथि अन्याय नै भएको जिकिर गर्ने प्रचण्डले भदौ ४ गते मात्रै नख्खु कारागारमै पुगेर रविप्रति सहानूभूति प्रकट गरे। 

यो मात्रै होइन, प्रचण्डले सुरुका दिनदेखि नै रविमाथि अन्याय नहोस् भनेर अन्तिमसम्म नै प्रयास गरेको भनिरहेका छन् । यो विषय रास्वपा कार्यकर्ताले बुझ्नुपर्ने प्रचण्डको जिकिर छ।

तर प्रचण्डको यो राणनीतिलाई सार्वजनिक रुपमा बाध्यकारी भनेर टिप्पणी हुँदै आएका छन् । २०६४ पछिका सबै निर्वाचनमा जनाधार घटेको माओवादीले आफ्नो शक्ति जोगाइराख्न कुनै न कुनै दलसँग गठबन्धन गर्नुपर्ने बाध्यता झेल्दै आएको छ । माओवादीले २०७४ को स्थानीय तहको निर्वाचनमा काँग्रेससँग गठबन्धन गरेको थियो भने सोही सालमा भएको केन्द्रको निर्वाचनमा एमालेसँग गठबन्धन ग¥यो । त्यस्तै २०७९ को स्थानीय र संघको निर्वाचनमा पनि माओवादीले काँग्रेससँग गठबन्धन गरेर संसदमा ३२ सिट कायम गरेको छ। तर हाल एमाले–काँग्रेसबीच नै गठबन्धन भइरहेको अवस्थामा २०८४ को निर्वाचनमा भने माओवादीलाई आफ्नो अस्थित्व रक्षाका लागि चुनौती पर्ने देखिन्छ । यस्तैमा प्रचण्डले रास्वपाप्रति देखाएको सहानूभूतिलाई रवि लिएर माओवादीले पार्टीप्रति सकारात्मक सन्देश बटुल्न खोजेको व्याख्या हुन थालेका छन् ।