काठमाडौँ । नेपाली काँग्रेसले गत भदौ २३ र २४ गतेको जेन–जी आन्दोलनको क्रममा भौतिक संरचनामाथि तोडफोड, आगजनी र लुटपाटमा संलग्नलाई कारबाही गर्न माग गरेको छ ।

बिहीवार पार्टी केन्द्रिय कार्यालय सानेपामा बसेको पार्टी पदाधिकारी र पूर्वपदाधिकारीको बैठकले यस्तो माग राखेको प्रवक्ता डा. प्रकाशशरण महतले जानकारी दिए । बैठकपछि सञ्चारकर्मीहरुसँग कुरा गर्दै उहाँले तोडफोड, आगजनी र लुटपातमा संलग्नलाई कानूनी दायरामा ल्याउनुपर्ने पक्षमा नेताहरुले धारणा राखेको बताए । उनले जेनजीका आन्दोलनकारीलाई कारबाही नगर्ने गृहमन्त्री ओम प्रकाश अर्यालको अभिव्यक्तिप्रति आपत्ति समेत जनाए ।

महतका अनुसार बैठक पार्टीको अधिवेशनको विषयमा केन्द्रित थियो । बैठकमा नेताहरुबीच अधिवेशन नियमित समयमा गर्ने कि नगर्ने विषयमा मतभेद रहेका कारण ठोस निष्कर्षमा नपुगेको महतको भनाइ छ । बैठकमा केही नेताहरु बोल्न बाँकी रहेकाले फेरी भोलि छलफल हुने बताए ।

उनले भने, ‘अहिले पार्टीलाई समेत एउटा चुनौती खडा गरेको छ । योबाट कसरी अघि बढ्ने र सकारात्मक परिस्थिति निर्माण गर्ने ? लोकतान्त्रिक मूल्यमान्यतामा हामी प्रतिबद्ध छौं त्यसलाई कसरी जोगाउने र देशलाई पनि कसरी कमजोर हुनबाट जोगाउने भन्ने विषयमा साथिहरुले आफ्नो कुरा राख्नुभयो । पार्टीलाई कसरी अगाडि बढाउने र २६ गतेको केन्द्रीय कार्यसमितिको बैठकमा समान सोच लिएर जाने जाने छलफल भएको छ । त्यो बैठकमा मिान विचार लिएर जान्छौं । अहिले नेताहरुको धारणा केमा रहेको छ भने महाधिवेशन निर्धारित समयमा हुनुपर्छ भन्ने कुरा पनि आएको छ । तर कतिपय नेताहरुको दृष्टिकोाण चाँही मंसिरभित्रै सबै विधि प्रक्रिया पुरा गरेर गर्न सक्छौं कि सक्दैनौं ? त्यसको लागि थप समय पनि चाहिन्छ कि भन्ने कुरा पनि आएको छ ।’

जेन–जी आन्दोलनको क्रममा भएको लुटपाट र आगजनी तथा राष्ट्रिय राजनीतिको विषयमा पार्टीले यही असोज २६ गते बस्ने कार्यसमिति बैठकबाट आफ्नो धारणा सार्वजनिक गर्ने उनको भनाइ छ ।