काठमाडौँ । राजनीति र सत्तामा वर्षौंदेखि हलिमुहाली गरिएआएका केही थान नेताहरुप्रतिको चरम आक्रोशका रुपमा जेनजी विद्रोह विस्फोट थियो, भदौ अन्तिम साता । त्यसले तत्कालीन सत्तालाई झुकाएन मात्रै, सत्ता र शक्तिमा म्याजिकल चियर खेलिरहेका ती केही थान अनुहारबाट मुलुकलाई मुक्ति दिलाउने संकल्प सँगालिएको थियो । तर उक्त आन्दोलनको तीन महिना नपुग्दै ती अनुहारहरु अझै सक्रिय राजनीतिमा झन बलिया दाबेदार भएर देखा परेका छन् । नेकपा एमाले अध्यक्ष केपी शर्मा ओली, काँग्रेस सभापति शेरबहादुर देउवा र पछिल्लो समय माओवाद विसर्जन गरेर नेकपाका संयोजक बनेका प्रचण्डहरुको दाउपेच सतहमै देखिएको छ । केही समयअघि ओलीले कसैले फेसबुकमा लेख्दैमा आफूले पद नछाड्ने बताए भने आसन्न महाधिवेशनबाट समेत आफै अध्यक्षमा दोहोरिने उनको उत्कट लालसा छ ।

स–साना झुण्ड र पार्टीहरू एकीकृत गर्दै ठूलो दल बन्ने सपना देखिरहेका नेपाली कम्युनिष्ट पार्टीका संयोजक पुष्पकमल दाहाल प्रचण्ड पुनः सक्रिय राजनीतिमा हाबी हुन खोजिरहेका छन् । एकातिर आफूमा पदमा रहिरहन नचाहेको भन्छन्, अर्कोतिर आफूहरु जेनजीभन्दा कम नरहेको भन्दै सक्रिय राजनीति गरिरहन पाउनुपर्ने बताउँछन् । उनको मौसमी कुरालाई विश्वास गर्न छाडिसकेका छन्, जनताले । तर पनि आफू पुनः सत्ता र शक्तिमा फर्किनका लागि प्रचण्डले अनेक गर्न खोजिरहेका छन् । बिहीवार काठमाडौंमा आयोजित एकता घोषणा सभामा उनले उमेरको हिसावले धेरैजसो नेताहरु उत्तराद्र्धमा रहेको तथ्य स्वीकार्दै राष्ट्रप्रतिको जिम्मेवारी भने अझै बाँकी रहेको बताए । राष्ट्र जसरी भए पनि बचाउनुपर्छ, समाजवादको यात्रा जसरी पनि अगाडि बढाउनुपर्छ भन्ने कुरामा आफू जेन–जी युवाहरुभन्दा कम नरहेको उनको दाबी छ । अन्तिम समयसम्म आफूहरु सक्रिय भुमिका निर्वाह गर्ने आकंक्षामा रहेको पनि उनले खुलेरै बताए । 

ओलीसँग मुकाबिला गर्न नसकेर एमालेबाट बाहिरिएका र हाल प्रचण्डकै छहारीमा पुगेका नेकपाका सहसंयोजक माधव नेपालको पनि फूर्ति जेन–जीभन्दा बढ्ता नै देखिएको छ । बिहीबार उनले एमाले अध्यक्ष ओलीप्रति लक्षित गर्दै सफल हुँदैन भनिएको आफूहरुको एकता झन झन सफल भइरहेको दाबी गरे । नेता नेपालले आफ्नो पार्टीप्रति दिन–प्रतिदिन आम नागरिकको आकर्षण बढ्दै गएको दाबी गर्दै शुक्रबार धनगढीमा हुने सन्देश सभामा तीसौँ हजार मानिस उतार्ने दाबी गरे । ओलीबाट पेलान खेपेका र प्रचण्डको निरन्तर साथ पाएका उनी पछिल्लो समय नेकपामा मख्ख मात्रै छैनन्, पुनः शक्ति र सत्तामा फर्किन पाउने लालसामा समेत छन् ।

तर, माधव नेपाल प्रचण्डको छहारीमा जाँदा र रामकुमारी झाँक्रीहरु एमालेमा फर्किंदा नेकपा एकीकृत समाजवादी पुनःगठन गरेर बसेका घनश्याम भुसाल भने पुरानै नेताहरुको पुनरागमनले देश डरलाग्दो द्वन्द्वतर्फ जान लागेको बताउँछन् । ती पुराना नेताहरुले जेन–जी आन्दोलनको मुद्दालाई नजरअन्दाज गरिरहेको उनको आरोप छ । समाजले ‘रिजेक्ट’ गरेका पुरानै पार्टीका पुरानै अनुहारहरु राजनितिमा सक्रिय हुने प्रयासमा लागिरहेको बताउँदै फेरि शक्ति र सत्ता उनीहरुकै हातमा फर्कियो भने देश अर्को डरलाग्दो द्वन्द्वतर्फ जाने उनको दाबी छ । जेन–जी आन्दोलनको अर्थ–राजनीतिक ओज धेरै गहिरो रहेको बताउँदै भुसालले यसलाई नबुझ्नु राजनीतिक नेताहरुको भयंकर नालायकी हुने बताए । संविधान निर्माणपछि देशमा असाधारण राष्ट्रिय आकांक्षा बने पनि त्यही समय कम्युनिष्ट नेतृत्वले सही निर्णय गर्न नसक्दा जनतामा तिब्र निराशा पैदा भएको उनले बताए । पुराना दल र नेताहरुले शासन संयन्त्रका सबै तहमा जनताको विश्वास गुमेपछि जेन–जी आन्दोलनको नाममा विद्रोह भएको उनको ठहर छ । 

उता एमालेभित्र ओली नै पुनः पार्टी नेतृत्वमा आउन सबै हत्कण्ठा अपनाइरहेको बेला काँग्रेसभित्र पनि बहुमत पक्षको विशेष महाधिवेशन मागलाई बेवास्ता गर्दै देउवा पक्षधर नेताहरु पुरानै रोलमा सक्रिय भएका छन् । यी तमाम दृश्यले मुलुकको राजनीतिमा तत्कालै ठूलो फेरबदल नहुने, बरु झनै अस्थिरता र नयाँ–नयाँ द्वन्द्व निम्तिने खतरा देखिन्छ ।