काठमाडौं । पाटन दरबार क्षेत्र बाट सुरु भएको वन रन इन्टरनेश्नल हाफ म्याराथन सम्पन्न भएको छ । जेठ ९ गते यो म्याराथन विश्वका ३७ देशका ११२ भन्दा बढी सहरमा एकैदिन आयोजना गरिएको थियो । यो प्रतियोगिता नेपालमा एन.आर.एस स्पोट्र्स फाउन्डेसनले आयोजना गरेको हो। 

दौडमा हाफ म्याराथन, १० किमी, ५ किमी र १ किमी विधामा बालबालिकादेखि ज्येष्ठ नागरिकसम्म सहभागी भएका थिए। प्रतियोगिताको रुट मंगलबजार, पुल्चोक, जावलाखेल, सातदोबाटो, बल्खु, कलंकी हुँदै पुनः कृष्ण मन्दिरमा आएर टुंगिएको थियो।

नेपालसहित बहराइन, बंगलादेश, बेलारुस, ब्राजिल, कतार, चीन, इजिप्ट, भारत, जोर्डन, किर्गिस्तान, मलेसिया, पाकिस्तान, साउदी अरेयिबा, सर्बिया, ताजिकिस्तान, चिलि, लेबनान, आर्मेनिया, ट्युनिसिया, भेनेजुएला लगायत ३८  भन्दा बढी देशका करिब २ लाख ५० हजार धावक सहभागी हुँदा नेपालबाट मात्रै १२०० भन्दा बढी धावक सहभागी भएका थिए। वन रन इन्टरनेश्नल हाफ म्याराथन दुई पटक गिनिज बुक अफ वल्र्ड रेकर्डमा समावेश भैसकेको छ ।