काठमाडौँ । विश्व वातावरण दिवसको अवसरमा वर्ल्ड भिजन इन्टरनेशनल नेपालको नेतृत्वमा देशभर 'एक बालबालिका, एक बिरुवा' नामक राष्ट्रिय अभियान सफलतापूर्वक सम्पन्न भएको छ। स्थानीय सरकार, विद्यालय र समुदायको सहकार्यमा सञ्चालित यस अभियान अन्तर्गत देशभरका करिब ८० हजार बालबालिकाहरूले उत्साहपूर्वक वृक्षारोपण गरेका छन्।

यो अभियान नेपालका हिमाल, पहाड र तराईका १७ जिल्लाका ४६ वटा स्थानीय तहहरूमा विस्तार गरिएको थियो। वातावरण संरक्षणका साथै दिगो जीविकोपार्जन, खाद्य सुरक्षा र पोषणमा टेवा पुर्‍याउने उद्देश्यले विद्यालय, समुदाय, वडा कार्यालय र घरआँगनमा आँप, लिची, अम्बा र सुन्तलाजस्ता फलफूलका साथै स्थानीय हावापानी सुहाउँदा हजारौँ बिरुवाहरू रोपिएका छन्।

यस वृहत् कार्यक्रमको मुख्य विशेषता समावेशिता रह्यो, जहाँ ५७३ जना अपाङ्गता भएका बालबालिकाहरूले पनि सक्रियताका साथ बिरुवा रोपेका थिए। अभियानलाई सफल बनाउन २७ वटा साझेदार संस्थाहरू, स्थानीय सरकार र सामुदायिक वन समूहहरूले समन्वय गरेका थिए भने रोपिएका बिरुवाहरूको दीर्घकालीन संरक्षणका लागि प्राङ्गारिक मलको प्रयोग र नियमित अनुगमनको योजनासमेत बनाइएको छ।

स्थानीय जनप्रतिनिधि तथा विद्यालयका प्रधानाध्यापकहरूले यस अभियानले बालबालिकालाई प्रकृतिप्रति जिम्मेवार बनाउन र व्यावहारिक शिक्षा प्रदान गर्न ठूलो भूमिका खेलेको बताएका छन्। वृक्षारोपणमा सहभागी रोशनी यादव र गौतम साहलगायतका बालबालिकाहरूले आफूले रोपेका बिरुवाको नियमित हेरचाह गर्ने र हरियाली भविष्यका लागि साथीहरूलाई पनि प्रोत्साहित गर्ने प्रतिबद्धता जनाएका छन्।

वर्ल्ड भिजन इन्टरनेशनल नेपालकी राष्ट्रिय निर्देशक रोजलिन हन्सन ग्याब्रिएल र सह-निर्देशक प्रकाश तिवारीले बालबालिकाहरू जलवायु समाधानको सक्रिय योगदानकर्ताका रूपमा उभिनु निकै प्रेरणादायी रहेको बताएका छन्। एकीकृत योजना र सामूहिक सहकार्यको बलमा बालबालिका आफैँले हरित भविष्यका लागि नेतृत्व लिएको देख्दा संस्था गौरवान्वित भएको उनीहरूको भनाइ छ।