काठमाडौँ । सरकारले डा. विश्वनाथ पौडेललाई नेपाल राष्ट्र बैंकको गभर्नर नियुक्त गरेको छ । मंगलवार बसेको मन्त्रीपरिषद्को बैठकले डा. पौडेललाई नेपाल राष्ट्र बैंकको गभर्नर नियुक्त गरेको हो ।

यसअघि उपप्रधानमन्त्री एवं अर्थमन्त्री विष्णुप्रसाद पौडेलको संयोजकत्वमा रहेको गभर्नर सिफारिस समितिले तीन जनाको नाम गभर्नरका लागि मन्त्रीपरिषदमा सिफारिस गरेको थियो । डा. विश्वनाथ पौडेल, का.मु गभर्नर निलम ढुंगाना र  पूर्वसचिव दिनेश भट्टराई सिफारिस भएकाेमा तीमध्येबाट पौडेललाई नियुक्त गरिएको सरकारका प्रवक्ता एवं सञ्चार मन्त्री पृथ्वीसुब्बा गुरुङले बताए ।

उनले भने, ‘उपप्रधानमन्त्री एवं अर्थमन्त्री माननीय विष्णुप्रसाद पौडेको नेतृत्वमा बनेको तीन सदस्यीय सिफारिस समितिको सिफारिसका आधारमा तीन जना व्यक्तिहरु डा. विश्वनाथ पौडेल, का.मु गभर्नर निलम ढुंगाना, डा. दिनेश भट्टराई पूर्वसचिव तीन जना सिफारिस गरेकोमा डा. विश्वनाथ पौडेललाई नेपाल राष्ट्र बैंकको गभर्नर पदमा सिफारिस समितिले सिफारिस गरेको तीन जना मध्येबाट नियुक्त गर्ने निर्णय गरेको छ ।’

मन्त्री गुरुङले लामो प्रतिक्षापछि गभर्नरको विषय टुंगिएको बताए । राष्ट्र बैंकको १८ औँ गभर्नर बनेका डा. पौडेलसँग विगतमा राष्ट्रिय योजना आयोगको भएर काम गरिसकेको अनुभव छ । उनी प्रमुख सत्तारूढ दल काँग्रेसकाे काेटाबाट राजनीतिक सहमतिका आधारमा गभर्नर नियुक्त भएका हुन् ।