काठमाडौँ । नेपाली कांग्रेसका बरिष्ठ नेता अर्जुननरसिंह केसी अहिलेको नेपाली राजनीतिक परिवेशमा एक दूरदृष्टि सम्पन्न, साहसी र निडर नेताको रूपमा चिनिँदै आएका छन्। पार्टीभित्र मौलाउँदै गएको भ्रष्टाचार, दण्डहीनता र गुटबन्दी राजनीतिविरुद्ध खुलेर बोल्दै आएका केसी, आज जनतामाझ ‘सत्य बोल्ने नेता’ का रूपमा परिचित छन्।

नेता केसीले पछिल्ला वर्षहरूमा पार्टीभित्रैबाट आवाज उठाउँदै नेतृत्वलाई पटक–पटक सचेत गराउँदै आएका छन्- “यदि हामीले समयमै सुधारको बाटो नलियौं भने नेपाली कांग्रेस जनताको विश्वास गुमाएर इतिहासकै पाना मात्र बन्न सक्छ।” 

पार्टीभित्रको अस्वस्थ प्रतिष्पर्धा र भ्रष्टाचारमाथि प्रहार

अर्जुननरसिंह केसी विगत लामो समयदेखि पार्टीभित्र मौलाउँदै गएको भ्रष्टाचार र आन्तरिक लडाइँप्रति कठोर आलोचकका रूपमा परिचित छन्। उनका अनुसार, पार्टी नेतृत्वले जनताको भावना बुझ्न छाडेको छ, र यही कारण आज युवाहरूमा कांग्रेसप्रति निराशा बढ्दै गएको छ।

उनी भन्छन्, “२०४६ सालदेखि सार्वजनिक पदमा बसेका सबै नेताहरूको सम्पत्ति छानबिन हुनुपर्छ। जनताको करबाट उठेको पैसामा ऐश्वर्य प्रदर्शन गर्ने नेताहरूले अब जवाफ दिनैपर्छ।”

उनले भ्रष्टाचार, अनियमितता र आन्तरिक स्वार्थका कारण कांग्रेस पार्टी आफ्नो लोकतान्त्रिक पहिचान गुमाउँदै गएको बताए।

जेन-जी  आन्दोलनको परिणाम र नयाँ राजनीतिक समीकरण

हालै २३ र २४ गते भएको जेन-जी आन्दोलनले दुई ठूला पार्टीहरूको संयुक्त सरकार सत्ताबाट हटाएको घटना नेपाली राजनीतिमा ठूलो मोडको रूपमा आएको नेता केसीको ठम्याइ छ।

उनका अनुसार, जनताको दबाबकै कारण पूर्वन्यायाधीश सुशीला कार्कीको नेतृत्वमा स्वतन्त्र अन्तरिम सरकार गठन भएको हो, जसले देशलाई समयमै निर्वाचनमा लैजाने जिम्मेवारी लिएको छ।

केसी भन्छन्, “यो सरकार जनताको आक्रोश र चेतनाको परिणाम हो। जनताले अब माफी दिँदैनन्, समयमै सुधार नगर्ने हो भने जुनसुकै दल पनि मेटिन सक्छ।”

 जनआक्रोश र भविष्यप्रतिको चेतावनी

नेता केसीले बारम्बार चेतावनी दिएका छन्— “यदि समयमै जनताको निराशा सम्बोधन गर्न सकिएन भने देशमा ठूलो आन्दोलनको आँधीबेरी आउनेछ, जसलाई रोक्न कुनै शक्ति सक्षम हुने छैन।”

उनले पार्टी नेतृत्वलाई स्मरण गराए, “समयले कसैलाई पर्खिँदैन। युवाहरूको विश्वास र भविष्य गुमाउने पार्टी इतिहासमा मात्र सीमित हुन्छ।”

 रुपान्तरण र पुस्तान्तरणको आवश्यकता

आजको सन्दर्भमा नेता केसीले स्पष्ट धारणा राखेका छन्— “युवाले खोजेजस्तो नयाँ सोच, नयाँ अभ्यास र नयाँ नेतृत्व पार्टीभित्रैबाट आउन जरुरी छ। रुपान्तरण र पुस्तान्तरण बिना कांग्रेसले आफ्नो अस्तित्व जोगाउन सक्दैन।”

उनले थपे, “जनताको उकुसमुकुस सडकमा पोखिँदा २७ घण्टामा देश खरानीमा परिणत भयो। अब यही खरानीबाट टकटकाउँदै पुनः उठ्न जरुरी छ। कांग्रेसले जनताको विश्वास जित्ने हो भने इमानदार नेतृत्व, स्पष्ट दृष्टिकोण र नीति–आधारित राजनीति अपरिहार्य छ।”

केपी ओली र ठूला दलप्रतिको टिप्पणी

नेता केसीले हालका ठूला दलका शीर्ष नेताहरूको अकर्मण्यता र सत्ताप्रतिको मोहकै कारण आजको संकट निम्तिएको बताएका छन्। उनकाे टिप्पणी छ, “केपी ओलीको भुइँ चढाइ र कांग्रेसजस्ता लोकतान्त्रिक दलहरूको कमजोरीले जनताको भरोसा गुमाएको छ। लोकतान्त्रिक दलहरूले आत्ममूल्यांकन नगरेर अझै पनि शक्ति र स्वार्थमा अड्किएका छन्।”

निष्कर्ष

अर्जुननरसिंह केसी जस्ता नेताहरूले उठाएको प्रश्न अब केवल पार्टीभित्रको विवाद मात्र होइन, देशको लोकतान्त्रिक भविष्यसँग जोडिएको चेतावनी हो। उनले भनेझैं- “समयले कसैलाई पर्खिँदैन, रुपान्तरण अस्वीकार गर्ने पार्टी इतिहासमै हराउँछ।”

नेपाली कांग्रेस अहिले निर्णायक मोडमा छ- या त सुधारको बाटो रोज्ने, या त जनताको विश्वास गुमाएर इतिहासको पाना बन्ने।