कैलाली । नेपाली कम्युनिस्ट पार्टीले प्रदेशस्तरीय एकता सन्देश सभा अभियान सुरु गरेको छ । सो अभियान सुदूरपश्चिम प्रदेशको धनगढीबाट सुरु भएको छ ।
पार्टी एकता सन्देश सभाको नाममा चुनावी अभियान समेत शुरु गरेको नेपाली कम्युनिस्ट पार्टीले अबको प्रमुख शक्ति बन्ने दाबी गरिरहेको छ । सुदूरपश्चिमबाट शुरु भएको सभा देशका विभिन्न क्षेत्रमा सम्पन्न हुने बताइएको छ ।
सुदूरपश्चिम प्रदेशको धनगढीबाट नेपाली कम्युनिस्ट पार्टीले शुक्रबार पार्टी एकता सन्देश सभाको सुरुवात गरेको छ । कार्यक्रममा बोल्दै कम्युनिष्ट पार्टीका संयोजक तथा पुर्वप्रधानमन्त्री पुष्पकमल दाहाल प्रचण्डले अहिलेको सरकारले तोकिएको मितिमा निर्वाचन गर्नुपर्नेमा जोड दिएका छन् । प्रचण्डले १५ भन्दा बढी वाम घटक गोलबद्ध भएर नेपाली कम्युनिस्ट गठन भएको बताउँदै एमालेतिर पनि ध्यान केन्द्रित रहेको बताएका हुन् ।
१५ वटा वाम घटकबीच एकता हुनु नेपालको इतिहासमै पहिलो रेकर्ड भएको प्रचण्डको दाबी छ । देशभरका क्रान्तिकारीले नेपाली कम्युनिस्ट पार्टी आशा र नयाँ भरोसाका साथ हेरिरहेको उनको भनाइ छ ।
त्यस्तै नेपाली कम्युनिस्ट पार्टीका सहसंयोजक तथा पूर्वप्रधानमन्त्री माधवकुमार नेपालले आफ्नो पार्टीप्रति दिन प्रतिदिन आम नागरिकको आकर्षण बढ्दै गएको बताए । नेता नेपालले सबै नेता उस्तै नभएको भन्दै नेकपाले समाजवाद आत्मसाथ गर्दै देश विकास गर्न चाहेको बताए ।
यो देश निर्माण गर्ने अभियानमा अगाडि बढ्न सबैलाई आह्वान समेत गरेका छन्। नेता नेपालले देशमा समस्या खडा भएको बताउँदै त्यसबाट शिक्षा लिएर अगाडि बढ्ने बताएका छन् । उनले प्रचण्ड र आफू प्रधानमन्त्री हुँदा सुदूरपश्चिममा धैरै राम्रा काम भएको चर्चा समेत गरेका छन्।
दलहरूमा दलालीकरण, ठेकेदारीकरण, व्यापारीकरण, भ्रष्टीकरण, अपराधीकरणको प्रवृत्ति चुलिएको उल्लेख गर्दै नेता नेपाल त्यसलाई अन्त्य गरेर नेपालको राजनीतिलाई स्वच्छ बनाउने कामको अगुवाइ अब नेपाली कम्युनिष्ट पार्टीले गर्ने बताउछन् ।
त्यस्तै नेकपाका नेता डा. भीम रावलले आगामी फागुन २१ गते हुने निर्वाचनमा प्रमुख राजनीतीक शक्ति भएर देशको नेतृत्व गर्ने बताएका छन् । रावलले आफ्नो पार्टी पूर्ण निर्वाचनको रूपमा तयार रहेको बताउदै तोकिएकै समयमा स्वच्छ, निष्पक्ष र भयरहीत निर्वाचन सुनिश्चित गर्न सरकार गम्भीर हुनुपर्नेम जोड दिएका छन् ।
रावलले आगामी निर्वाचनमा सुदूरपश्चिमबाट नेपाली कम्युनिष्ट पार्टी एक नम्बर हुने दाबी समेत गरे । एमाले अध्यक्ष केपी ओलीको स्वेच्छाचारी शासनले गर्दा मुलुकले दुर्घटना व्यहोर्नु परेको उनको भनाई छ ।
सन्देशसभा सुरु हुनुअघि नेपाली कम्युनिष्ट पार्टीले धनगढीको दुई ठाउँबाट ¥याली निकालेको थियो । चौराहा र क्याम्पस चोकबाट निकालिएको ¥याली धनगढी रङ्गशालामा पुगेर सभामा परिणत भएको हो ।
