काठमाडौं । उज्यालो नेपाल पार्टीको औपचारिक घोषणा मंसिर १७ गते ऊर्जामन्त्री कुलमान घिसिङको सहभागीतामा हुने भएको छ । कुलमान आफै त्यो पार्टीमा सहभागी नभएपनि निर्वाचनताका उनी सक्रिय हुने दाबी गर्ने गरिएको छ ।
यसलाई पुष्टी हुने गरि कुलमानले पार्टी घोषणासभामा सहभागीता जनाउने भएपछि अब उनी अन्तरिम सरकारमा कहिलेसम्म रहन्छन् भन्ने चासो बढेको छ । यस्तोमा उज्यालो नेपाल पार्टीको राजनीतिक गतिविधि र सक्रियताको सवाल थप रोचक बनेको छ ।
नेपाल विद्युत प्राधिकरणको कार्यकारी निर्देशक पदबाट तत्कालीन सरकारबाट बर्खास्तीमा परेका कुलमान घिसिङ ऊर्जा, भौतिक पूर्वाधार र शहरी विकास मन्त्रालयको जिम्मेवारी बहन गरेपछि उनको सक्रियता रोचक देखिन्छ ।
उनी विभिन्न जिल्लाको अवलोकनमा जाने, जनतालाई प्रभावित पार्ने, योजना निर्माणको बहस गर्ने र ठेक्का तोड्ने काम गर्दै आफूलाई आगामी चुनावका लागि तयार गरिरहेका छन् । तर, अन्तरिम सरकारमा मन्त्री बनेका कारण उनी दल दर्ता वा अन्य विषयमा के गर्लान् भन्ने चासोलाई भने मेटाउदै लगेका छन् ।
कुलमान उज्यालो नेपाल पार्टीको घोषणासभामा सहभागी हुने जानकारी सार्वजनिक भएसँगै कुलमानको लाइन औपचारिक रुपमा सतहमा देखिएको हो ।
काठमाडौंको प्रज्ञा भवनमा सभा आयोजना गर्ने निर्णय गरिएको पार्टीका प्रवक्ता डा. राजु थापाले बताएका छन् । घोषणा सभाको प्रमुख कुलमान घिसिङ हुने बताइएको छ ।
उज्यालो नेपाल पार्टीले लोकतान्त्रिक समाजवादलाई अंगिकार गरेर अघि बढ्ने भनेको छ । अन्य सबै पार्टीको राम्रा पक्षलाई आत्मासात गरेर अघि बढ्ने योजना बनेको दाबी गरिएको छ । यो दाबीले कुलमानको पार्टीले बोक्ने विचारधारा भने प्रष्ट हुन सकेको छैन् ।
जसकारण यो पार्टीको सहकार्यका लागि काठमाडौं महानगरपालिकाका मेयर बालेन्द्र साह ’बालेन’ तयार भएको दाबी गर्ने गरिएको छ भने कुलमानलाई प्रधानमन्त्रीको उम्मेदवारको रुपमा अघि सार्दै रवि लामिछानेलाई पार्टी सभापतिको रुपमा लिने हल्ला समेत चलाइएको छ । तर, तत्कालका लागि उज्यालो नेपालले खगेन्द्र सुनार नेतत्वको दलसंग चुनावी सहकार्य गर्ने सहमति भने गरिसकेको छ ।
अन्तरिम सरकार र कुलमानको दाउ
अन्तरिम सरकार जनताबाट म्याण्डेट प्राप्त होइन् । तर, यसलाई नागरिक सरकार भन्ने गरिन्छ । जुन सरकारको प्रमुख दायित्व भनेकै निर्वाचन सम्पन्न गराउने र निर्वाचनपछि आउने शक्तिलाई सरकारको जिम्मेवारी सुम्पिने हुन्छ । तर, सुशीला कार्की नेतृत्वको सरकारका कुनै पनि मन्त्रीले निर्वाचन नलड्ने र निष्पक्ष निर्वाचनको माहोल बनाउने भनिएपनि कुलमान भने कस्सिएका छन् । संविधानतः कुलमान दल दर्तादेखि उम्मेदवार बन्न स्वतन्त्र भएपनि चुनावी सरकारको मन्त्री आफैले गराएको चुनावमा सहभागी हुने कुरा भने खास नैतिक नहुने तर्क गर्ने गरिन्छ ।
विजुलीको चिम र कुलमान
उज्यालो नेपाल पार्टी पूर्णतः कुलमान घिसिङमै केन्द्रित बन्नेछ । कुलमानले नेपाललाई लोडसेडिङमुक्तबनाउन भूमिका खेलेको भन्दै यसको श्रेय तत्कालीन प्रधानमन्त्री प्रचण्ड र ऊर्जामन्त्री जनार्दन शर्मालाई दिने गर्थे । तर, पछिल्लो समय यो ब्राण्डमा आफैलाई स्थापित गर्ने गरि बिजुलीको चिम लिएर उज्यालो नेपाल पार्टीमार्फत चुनावमा जाने भएका हुन् । यहि विषयका कारण समेत वैकल्पिक शक्ति निर्माणको प्रयास सफल हुन नसकेको कतिपयले तर्क गर्ने गरेका छन् ।
राष्ट्रिय स्वतन्त्र पार्टीमा सभापति नै चाहिने दाबी गरेका कुलमानलाई नेताहरुले मुख्य नेता आयात नगर्ने भन्दै झड्का नै दिएपछि अन्ततः उनी चिम बोक्नुपर्ने निष्कर्षमा पुगेका हुन् ।
उसतोः अहिले पनि निर्वाचनमा जादा एकल चुनाव चिन्ह लिएर जाने विषयमा बहस चलिरहेको देखिन्छ । तर, घोषणासभामा कुलमान कसरी पेश हुन्छन र उनले राजनीतिक दलको रुपमा कस्तो विचार पेश गर्छन् भन्ने चासो भने बढेको छ ।
चुनावी तयारी
कुलमान घिसिङले एक टेलिभिजन अन्तरवार्तामा समेत आफूले रामेछापबाट मतदाता नामावली काठमाडौं निर्वाचन क्षेत्र नम्बर ३ मा सारेको बताएका छन् । काठमाडौं निर्वाचन क्षेत्र नम्बर ३ कांग्रेसका सन्तोष चालिसेले जितेको क्षेत्र हो ।
यसमा रास्वपाले समेत अघिल्लो चुनावमा ५ हजार चानचुन मत प्राप्त गरेको थियो । यसरी हेर्दा कुलमानले यहि क्षेत्रबाट निर्वाचन लड्ने तयारी थालेको संकेत गरिरहेका छन् ।
यता, प्रधानमन्त्री सुशीला कार्कीले समेत कुलमानले बिजुली पार्टी खोलेको भन्दै सार्वजनिक बयान दिइसकेकी छन् ।
यसरी हेर्दा कुलमानले उम्मेदवारी मनोनयन दर्ताको केहि समय पहिले मन्त्री पदबाट राजीनामा दिएर चुनावी मैदानमा उत्रिने चर्चा चलिरहेको छ ।
