काठमाडौं । एकता सन्देश सभामा जुटेको नेपाली कम्युनिस्ट पार्टीले दोस्रो दिन दाङको देउखुरीमा सभा सम्पन्न गरेको छ । दाङ पुगेको नेकपाले एकता सन्देशसभाबाट जनतामा आत्मालोचना गर्न आएको भन्नेदेखि एमालेमाथिको आक्रोश पोख्ने काम चलिरहेको छ । कैलालीको धनगढीबाट अघि बढेको नेकपा दाङमा पुगेको छ, भने नेताहरुले अबको प्रमुख शक्ति बन्ने दाबी गरिरहेका छन् ।
प्रचण्डको नेतृत्वमा १५ वटा घटक मिलेर नेपाली कम्युनिस्ट पार्टी बनेको दाबी गर्दै प्रचण्डअहिले देशव्यापी प्रचारप्रसारमा जुटेका छन् । प्रचण्डले प्रचारको शैली अपनाएका छन्, एकता सन्देश सभाको आयोजना । पहिलो दिन शुक्रबार कैलालीको धनगढीबाट शुरु गरिएको सभा शनिबार दाङमा आयोजना गरियो ।
व्यक्ति, समूह र दलहरु मिसिएपनि उनीहरुमाथि जनताको विश्वास कति रहला ? तमाम प्रश्नको जवाफ आगामी निर्वाचनले नै दिनेछ । तर, कैलालीको धनगढीमा देखिएको जनताको उस्ताह दाङमा आउदा पनि उस्तै रहेको भन्दै नेकपाका संयोजक प्रचण्ड प्रशन्न देखिएका छन्, भने आफ्नो प्रसंसा नै गरेका छन् ।
प्रचण्डले अहिलेको परिस्थितिबारे जानकारी दिदै जेनजी आन्दोलनअघि आत्मालोचनाको क्रम शुरु भएको दाबी गर्दै प्रचण्डले अहिलेको स्थितिमा आइपुग्न ठूलो मेहनत, विश्वास र सम्बन्धका आयामहरुले काम गरेको दाबी गरे ।
पार्टी एकतापछि प्रचण्डले सम्बोधनको क्रममा दाङको देउखुरीमा पुगेर समेत एकता सन्देश सभालाई आत्मालोचना सभाको रुपमा लिनुपर्ने भनेका छन् ।
यतिमात्रै होइन कमजोरीको खोजीमा आफु लागेको बताउँदै गर्दा प्रचण्डले एमाले अध्यक्ष केपी ओलीप्रति पनि कडा कटाक्ष गरे । सत्तामा काम गराइबारे टिप्पणी गर्दै प्रचण्डले चुनाव जितेर मात्रै केहि नापीने रहेनछ, आखिर हेलिकोप्टर चढेर भाग्नुपर्दो रहेछसम्म भन्न भ्याए ।
प्रचण्डसंगै नेकपाका सह–संयोजक माधव नेपालले समेत १५ घटक मिलेर बनेको पार्टीले अबको नेपालको नेतृत्व गर्ने र यो सामान्य मेहनतले नभएको दाबी गरेका छन्।
दाङको देउखुरीमा प्रचण्ड–माधवसंगै वामदेव गौतम, डा. भीम रावल, वर्षमान पुन जस्ता नेताहरुले सम्बोधन गरेका छन् । नेताहरुको भिडले जनता समक्ष गरिरहेको सम्बोधनले कति काम गर्ला ? यो निर्वाचनको नतिजाले देखाउने नै भएपनि निर्वाचनको सम्मुख नेकपाले थालेको यो अभियानले उनीहरु हौसिएका छन् ।
नेकपाले दुई प्रदेश सुदूरपश्चिम र लुम्बिनीमा एकता सन्देश सभा सम्पन्न गरिसकेको छ भने अन्य पाँच प्रदेशमा समेत यसरी नै सन्देश सभाको आयोजना गर्ने भनेको छ । देश दौडाहामा रहेका नेताहरुविरुद्ध प्रश्न भने उठिरहेको छ ।
मञ्चमा नेताहरुको भीड देखिने गरेको भन्दै एकतामा आएका एक घटकका नेता गोपाल किरातिले प्रश्न गरेका छन् । मञ्चासन भद्दा र असुहाउँदो हुने गरेको आरोप किरातिले पहिले नै लगाइसकेका छन भने अर्का नेता लेखनाथ न्यौपानेले समेत यस्ता विषयमा विरोध जनाउने गरेका छन् ।
सामाजिक सञ्जालमा नेता न्यौपानेले लेखेका छन्, ‘घाँटीभरि माला लगाएर अटेसमटेस मञ्चमा उपरखुट्टी लगाएर ठालु बन्दा जनसमर्थन प्राप्त नहुने कुरो अबको स्वयम् सिद्ध तथ्य !’ । यसरी सन्देशसभामा उस्ताह देखिएको पक्ष एकातिर र अर्कातिर कार्यशैलीप्रति प्रश्न समेत गर्न थालिएको छ । तर, निर्वाचनको सम्मुखमा बढेको राजनीतिक दौडधुप र यस्ता क्रियाकलापले निर्वाचनमय देशको अवस्थालाई थप सहज हुने अपेक्षा भने गर्न थालिएको छ ।
