काठमाडाैँ । नेपाली काँग्रेसका महामन्त्री गगनकुमार थापाले नागरिकले सुनेका भ्रष्टाचारका सबै काण्डहरुको छानविन गर्नुपर्ने बताएका छन् । मंगलवार नेपाल प्रजातन्त्र सेनानी संघ वागमती प्रदेशको कार्यक्रमलाई सम्बोधन गर्दै उनले यस्तो प्रस्ताव अघि सारेका हुन् । 

आम नागरिकहरुले भ्रष्टाचारकै कारण देशले गति लिन नसकेको भनिरहेको बेलामा जनताले सुनेका सबै भ्रष्टाचार काण्डहरुको अख्तियार मार्फत वा सर्वशक्तिशाली आयोग बनाएर अनुसन्धान गर्नुपर्ने उनकाे भनाइ छ ।

२०८४ सम्ममा नेपाली समाज भ्रष्टाचारमुक्त बनाउनुपर्ने आवश्यकता रहेको बताउँदै थापाले अनियमिततामा दोषी ठहर भएको खण्डमा शक्तिशाली भनेर छोड्न नहुने बताए । उनले नेपालमा सार्वजनिक ओहोदामा बसेर भ्रष्टाचार गरेको मान्छेलाई नेपाली समाजले छोड्दैन भन्ने सन्देश दिनुपर्ने बताए ।

महामन्त्री थापाले भने, ‘आम नागरिकले भ्रष्टाचारकै कारणले गर्दा हामीले गति लिन सकेनौँ भन्ने सोच्छ । भ्रष्टाचारले हामीलाई यति गाँज्यो की हामीले ठिक गति समात्न सकेनौँ भन्ने कतिलाई लागेको छ भने यही तीन वर्षभित्रमा नेपाली समाज भ्रष्टाचारका सन्दर्भमा अहिले जुन अवस्थामा हामी छौँ । त्यसलाई न्युन गर्ने कुरामा ध्यान दिनुपर्छ । जति नेपाली जनताले सुनेका काण्डहरु छन् । त्यो चाहे वाइडबडी काण्ड होस्, ललिता निवास काण्ड होस्, गिरिबन्धुको होस्, सिविरको होस् । जति पनि छन्, लामो लिस्ट बन्छ, त्यो लिस्ट राख्ने, त्यो लिस्ट राखेर जनतालाई आश्वस्त पारौँ । यस भित्र भएको प्रत्येक काण्डहरु अख्तियारले गर्छ, हामीलाई विश्वास छ । अख्तियारले गर्न सक्दैन, कुनै एउटा सर्वशक्तिशाली आयोग बनाउनु पर्छ बनाऔँ । बनाइसकेपछि के सन्देश दिनुपर्छ भने यसमा कोको दोषी निस्किन्छ । प्रधानमन्त्री दोषी निस्किन्छ, पूर्वप्रधानमन्त्री, मन्त्री, सांसद जो दोषी निस्किन्छ, जतिसुकै शक्तिशाली होस्, प्रधानमन्त्री भएको मान्छे होस्, मन्त्री भएको मान्छे होस्, बहालवाला होस्, भुतपूर्व होस्, जो सुकै होस्, तर नेपालमा सार्वजनिक ओहोदामा बसेर भ्रष्टाचार गरेको मान्छेलाई नेपाली समाजले छोड्दैन, १५ वर्षपछि पनि र २० वर्ष पछि पनि छोड्दैन भन्ने मानक स्थापित गर्नसक्यो भने नौ जवानहरुलाई देश ठिक बाटोमा गयो भन्ने अवस्था बन्छ ।’ 

उनले नेपाली काँग्रेस कानूनको शासन मान्ने पार्टी भएकाे बताउँदै उनले गलत काम गर्ने मन्त्रीहरुलाई तत्काल बर्खास्त गर्नुपर्ने बताए ।